USD
КИЕВ. 10 наурыз. Украина Қарулы күштері Днепр облысының барлық жерлерін жау шеңгелінен босатты. Бұл туралы Dialog.ua ақпарына сүйенген rast.kz хабарлайды.
Ресейдің басқыншы армиясы Днепр облысының әкімшілік шекарасында «буферлік» аймақ құру үшін жанталасып бақты. Бірақ ақыры дегеніне жете алмады.
Мұның орнына, 10 наурызда Украина қорғаныс күштері Днепр облысының бүкіл аумағынан дерлік ресейлік оккупанттарды түре қуып шықты. Украина Қарулы күштері бас штабы бас операциялық басқармасының бастығы, генерал-майор Олександр Комаренко бүгін «РБК-Украина» ресурсына берген сұхбатында осының жайын баян етті.
Комаренко Украина әскерлерінің Олександровск секторындағы (Запорожье және Днепр облыстарының түйіскен жері) операциясын шабуыл ретінде сипаттады. Ол осы жылдың ақпан айының басында басталған. Жорыққа әуе-шабуыл әскерлері мен штурм күштері қатысқан, оларға осы секторды қорғайтын механикаландырылған бригадалар қолдау көрсетуде.
Олександровск секторындағы шабуыл кезінде украин жауынгерлері 400 шаршы шақырымнан астам аумақты жаудан тазартты. Днепр облысы толығымен дерлік азат етілді. Генералдың айтуынша, Украина Қарулы күштері енді үш елді мекенде жүріп жатқан жұмыстарды «аяқтап» шығып, тағы екеуіне шабуыл жасауы қажет.
Комаренко Ресей оккупациялық армиясының Днепр облысында Ресей диктаторы Владимир Путин жиі айтатын «буферлік» аймақ құру үшін шабуыл бастағанына сенімді. Ол 2026 жылғы көктемгі науқан кезінде жау Олександровск, Покровское және Запорожье бағыттарына басымдық беруді жалғастырады деп санайды.
Айта кету керек, Олександровск секторындағы шабуылмен қатар, орыс оккупанттары Запорожье облысындағы Гуляйполье қаласының маңында да шабуыл жасауға ұмтылуда. Жау Орехово қаласының тылына жетуге де тырысуда. Наурыз айында Гуляйпольеге жақын жердегі Железнодорожне селосында да жау жиі көріне бастады.
Украина Қарулы күштері бас штабының мәліметі бойынша, кеше, 9 наурызда ресейлік басқыншылар Олександровск секторындағы Украина Қарулы күштері позицияларына бес рет шабуыл жасаған. Шайқастар Ивановка, Добропилля, Тернов және Новое Запорожье елді мекендерінің маңында өтті. Жау көршілес Мирное мен Гуляйполье маңдарында, сондай-ақ Зеленое, Варваровка және Староукраинка бағытында Украина Қарулы күштерінің позицияларына 28 рет шабуыл жасады.
