USD
ПАРИЖ. 14 шілде. Еуропаның 9 елі және Украина Ресейдің баллистикалық зымырандарымен күресетін коалиция құру жөнінде келісімге келді. Бұл туралы Deutsche Welle (DW) ақпарына сүйенген rast.kz хабарлайды.
Париждегі кездесуде Украина мен тағы тоғыз ел жедел тәжірибе мен қорғаныс-өнеркәсіптік базаны қолдана отырып, «зымыранға қарсы қорғаныс архитектурасын» құруға өзара мәміле жасасты. Айтуларынша, аталмыш жүйе қорғаныс сипатына ие болады. Ал блокты құратын дәулеттер құрамында Германия, Украина, Дания, Франция, Италия, Нидерланд, Норвегия, Испания, Швеция және Ұлыбритания бар.
«Антибаллистикалық коалиция» құру туралы шешімді Париждегі 13 шілде күнгі отырыста аталған мемлекеттер мен үкіметтердің басшылары қабылдады.
«Коалицияға қатысушылар «Болашақ зымыран қауіптерін болдырмауға және тойтаруға» бағытталған «зымыранға қарсы интеграцияланған архитектура» арқылы Еуропаны қорғау қажеттілігіне сенімді. Жүйе «технологиялық ашықтық пен сенімді өнеркәсіптік ынтымақтастықтың арқасында ұжымдық күш-жігер жолымен» әзірленетін болады», – делінген баспасөз хабарламасында.
«Біздің қорғаныс-өнеркәсіптік базамызды, зерттеулерімізді және операциялық тәжірибемізді біріктіре отырып, біз Еуропа үшін зымыранға қарсы қорғаныстың жалпы әлеуетін құруға тырысамыз», – делінген Елисей сарайының сайтында.
«Жаңа жүйе «тек қана қорғаныс сипатында» болады және бұрыннан бар және сатып алуға жоспарланған ПРО жүйесін толықтырады», – делінген хабарламада. Бастамаға қатысушылар Еуропадағы баллистикалық зымырандардың өсіп келе жатқан қаупін алға тартты.
«Біз мұны кез-келген халыққа қарсы емес, өзімізді қорғау үшін жасаймыз», – деп түсіндірді мәлімдеме авторлары және Ресей бастаған соғыс кезінде алынған «Украинаның бірегей тәжірибесін» атап өтті.
