USD
ТАРАЗ. 5 маусым. Кеше Таразда Мемлекеттік рәміздер күні аясында пәтер кезегінде ұзақ жылдар бойы тұрған 90 адамға «Нұрлы жер» тұрғын үй бағдарламасы бойынша салынған пәтер кілттері табыс етілді. Бұл туралы Жамбыл облыстық әкімдігі баспасөз қызметіне сілтеме жасаған rast.kz хабарлады.
Пәтерлер жетім балаларға, мүгедектерге, толық емес және тұрмыстары төмен отбасыларға, сонымен қатар әлеуметтік жағынан халықтың осал тобындағы басқа да санаттарға жататын азаматтарға берілді. Олар жайласқан 5 қабатты екі тұрғын үй «Арай-2» шағын ауданында орналасқан.
Жиында Жамбыл облысының әкімі Бердібек Сапарбаев тұрғындарды қоныс тойымен құттықтады.
«Біздің елде қол жетімді баспана мәселесін шешуге айрықша көңіл бөлінуде. Өткен жылы «Нұрлы жер» бағдарламасы бойынша 2 мыңнан астам тараздық жаңа қоныс тойын тойласа, биыл облыс орталығын 50-ден астам көп пәтерлі тұрғын үй салу жоспарланған. Мемлекет басшысының тапсырмасымен әзірленген жаңа «5-10-20» бағдарламасы да мыңдаған отбасыларға баспана алуға мүмкіндік бермек. Мемлекеттік рәміздер күнімен қатар келген қоныс тойларыңыз құтты болсын! Шаңырақтарыңыз шаттыққа толы болып, береке-бірлігіміз арта берсін», – деді облыс әкімі.
Бұл күні қоныс тойын тойлағандар арасында Ауған соғысының ардагері Берік Торғайбековтің отбасысы да бар.
«Бізге қамқорлық көрсеткені және қолдау білдіргені үшін мемлекетке көп рахмет. Бүгін біз үшін қуанышты күн. Отбасымызбен ұзақ уақыт бойы пәтер жалдап тұрдық, баспана мәселесін өз бетімізше шешуге мүмкіншілігіміз болмады. Мемлекеттік қолдаудың арқасында бүгін біз екі бөлмелі пәтерге ие болдық», – дейді ол.
Іс-шараның салтанатты рәсімінен кейін кілт иелері пәтерлеріне асыға енді. Олардың жүздерінен баспана бақытын кешкен әсерлі сезімдерін байқамау мүмкін емес еді.
Еске сала кетейік, биылғы жылы Таразда 54 көп пәтерлі тұрғын үйдің құрылысы жүріп жатыр. Осылайша, 3025 отбасын жеке баспанамен қамтамасыз ету жоспарланған. Оның ішінде тұрмыстары төмен және көп балалы санатындағы 1100 отбасы бар.
Қазіргі таңда Тараз қаласында 8,6 мың адам тұрғын үй кезегінде тұр.
