USD
ҚЫЗЫЛОРДА. 31 шілде. Қызылорда қаласындағы Н.Бекежанов атындағы драма театрда Теміржол көлігі қызметкерлері күніне арналған салтанатты шара өтті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Жиынға Қызылорда облысының әкімі Мұрат Ергешбаев қатысып, сала ардагерлері мен қызметкерлерін кәсіби мерекемен құттықтады. Ол өз сөзінде Мемлекет басшысының көлік-логистика инфрақұрылымын дамыту жөніндегі тапсырмаларына тоқталып, теміржол саласының ел экономикасындағы стратегиялық маңызын атап өтті.
«Президент Қасым-Жомарт Тоқаев: «Жол – тіршілік көзі. Теміржол болмаса, экономика дамымайды. Біз көлік-логистика инфрақұрылымын дамытуға ерекше мән береміз» деп, саланы өркендетуді стратегиялық басымдық ретінде айқындаған болатын. Бүгінде елімізде мыңдаған шақырым жаңа теміржол желілері салынып, өткізу мүмкіндігі артып келеді. Сыр бойындағы болат жолдың тарихы тереңде жатыр. Бүгінде облыстың теміржол кешені заман талабына сай жаңарып келеді. Станциялар мен жол бойындағы нысандар автоматтандырылып, цифрлық жүйеге көшуде. 2024 жылы 600 млн теңгеден астам қаржыға Қызылорда теміржол вокзалы ғимараты күрделі жөнделіп, іргелес аумағы абаттандырылды», – деді аймақ басшысы.
Қазіргі таңда Президент тапсырмасына сәйкес, республика бойынша 124 теміржол вокзалы қайта жаңғыртудан өтуде. Соның ішінде Қызылорда облысында сондай 10 жоба қолға алынды. Осының нәтижесінде жақында ғана Қазалы, Шиелі, Жаңақорған, Сексеуіл теміржол вокзалдары мен Талап бекетіндегі жолаушылар платформасы жаңғыртылып, халық игілігіне берілді. Ал Арал, Төретам, Жосалы теміржол вокзалдарындағы, Тереңөзек және Жалағаш қызмет көрсету пункттеріндегі жұмыс кезең-кезеңімен аяқталып келеді. Жалпы, биыл Сыр бойында 80 шақырымнан астам теміржолға күрделі жөндеу жүргізілуде.
«Теміржол – ең алдымен, жоғары жауапкершілік пен темірдей тәртіпті талап ететін сала. Жаздың ыстығы мен қыстың аязына қарамастан, болат жолдың бойында үздіксіз қызмет етіп жүрген әрбір қызметкердің еңбегі зор құрметке лайық. Сіздерге барша Сыр жұртшылығының атынан шынайы алғысымды білдіремін. Баршаңызға мықты денсаулық, отбасыларыңызға амандық, жауапты да мәртебелі жұмыстарыңызға сәттілік тілеймін», – деді Мұрат Нәлқожаұлы.
Салтанатты шарада теміржол саласының бірқатар қызметкері облыс әкімінің Алғыс хатымен, «Қызылорда облысының дамуына қосқан үлесі үшін» төсбелгісімен, Көлік министрлігінің «Құрметті теміржолшы», «Қазақстан темір жолы» ұлттық компаниясы» акционерлік қоғамының «Адал еңбегі үшін», «Кәсібі бойынша үздік», «Үздік жас маман», «Үздік жол шебері», «Үздік байланысшы» төсбелгілерімен, Құрмет грамотасымен және III дәрежелі «Теміржолшы даңқы» медалімен марапатталды.
Жиында «Қазақстан темір жолы» ұлттық компаниясы» акционерлік қоғамы Қызылорда магистральдық желі бөлімшесі филиалының директоры Батырхан Базарбаев сөз сөйлеп, әріптестерін кәсіби мерекемен құттықтады.
Қазіргі таңда өңірдің теміржол саласында 7 мыңнан астам маман еңбек етеді. Облыс арқылы өтетін жүк пен жолаушылар легі, Сыр өңірінің транзиттік әлеуеті жыл сайын артуда.
Аймақтан «Батыс Еуропа – Батыс Қытай» халықаралық көлік дәлізімен қатар, ұзындығы мың шақырымнан асатын магистральдық теміржол желілері өтеді, 15 жолаушылар пойызы қатынайды. Жыл басынан бері 550 мыңнан астам жолаушы тасымалданып, 9 миллион тоннадан астам жүк жеткізілді.
Биыл мамыр айында жылына 600-ден астам вагонға техникалық қызмет көрсететін «Марал Нұр» жауапкершілігі шектеулі серіктестігінің жаңа кешені пайдалануға беріліп, 100 жаңа жұмыс орны ашылды.
Бұдан бөлек, Қытайдың «CRRC» компаниясымен бірлесіп, заманауи жолаушылар вагондарын құрастыру жобасын іске асыру жұмыстары пысықталып жатыр.
