USD
МӘСКЕУ. 31 шілде. Ресей Мемлекеттік думасының депутаттары биылғы жылдың соңына дейін Украинадағы соғысты тоқтатуға ешқандай негіз бен себеп жоқ деп тапты. Бұл туралы The Moscow Times ақпарына сілтеме жасаған rast.kz хабарлайды.
«2026 жылы соғысты аяқтаудың алғышарттары жоқ», – деді Мемлекеттік дума қорғаныс комитетінің мүшесі, запастағы генерал-лейтенант Виктор Соболев News.ru паблигіне берген сұхбатында.
«Соғыс операциясының мақсаттарына жетуіміз керек. Менің ойымша, бұл – Украинаның батыс шекарасына шығу. Дрондардың ауқымы артып келеді және қазір біздің әскерлер басып алған қауіпсіздік аймағы жеткіліксіз болатыны анық. Еуропа бізге тыныш өмір сүруге мүмкіндік бермейді. Егер қазір қандайда бір бітімге келісетін болсақ, онда бір жылдан кейін біз одан да қорқынышты және қанды соғысқа ұшыраймыз», – деді Соболев.
Bloomberg мәліметтері бойынша, биылғы жазда Владимир Путиннің соғыс мәселесіне байланысты көзқарасы өзгерген: Ресей тарапы енді оны тоқтату туралы келісімде бұған дейін басып алынған аумақтардың бір бөлігін Украинаға қайтаруға келіспейді. Мәскеу Сумы мен Харьков облыстарындағы аумақтарды буферлік аймақ ретінде бақылауды сақтап қалмақшы, ал Донбассты толық өз қарауына алуға тырысады. Сондықтан келіссөздер тек сол мақсаттарға жеткеннен кейін ғана қайта басталуы мүмкін деп санайды.
Bloomberg мәнбелері Мәскеу АҚШ президенті Дональд Трамппен Анкоридждегі саммитте қол жеткізілген бейресми келісімдер бұдан былай жұмыс істемейді деп шешті деп мәлімдеді.
Украинаның көшбасшысы Володимир Зеленський болса, бұған дейін бірнеше рет территориялық жеңілдіктерге бару, яғни басқыншы елге жер беру мәселесінен бас тартқан болатын.
