USD
ҚЫЗЫЛОРДА. 29 қаңтар. Қызылорда қаласының тұрғындарының «Қорқыт» сауда үйінде арзан бағамен сатылып жатқан аяқкиімдер үшін бір-бірімен жаға ұстасқандары аян болды . Бұл туралы Aikyn.kz ақпарына сүйенген rast.kz хабарлайды.
Жаға ұстатарлық оқыс оқиға 25 қаңтар күні орын алған. Сол күні қаладағы спорт бұйымдарын сататын «Қорқыт» сауда үйінің егесі барлық затты жеңілдетілген бағамен беруді ұйымдастырған. Тұрғындар соларды сатып алу барысында бір-бірімен жұлқысып, бір-бірін таптап кететіндей ахуалға жеткен.
«Арзан аяқкиім алмақ болған тұрғындар даурығып, жапатармағай ұмтылған. Дүкен иесі көпшіліктен кешірім сұрады», – деп жазады басылым мұны.
Сауда үйінде спорттық аяқкиім сататын жеке кәсіпкер 23 қаңтарда әлеуметтік желіде барлық аяқкиімді 1 000 теңгеден жаппай сатылымға шығаратыны туралы хабарлама жариялаған.
«Жеңілдік ұйымдастырылған күні адамдардың шектен тыс көп жиналуына байланысты келеңсіз жағдай болды. Дүкенді иесі сағат 10:30-да жабуға мәжбүр болған. Осы жағдайға байланысты кәсіпкер халық алдында кешірім сұрады. Ел арасында дүрбелең туындаған соң кәсіпкер аяқкиімдерді мұқтаж адамдарға таратып, қарттар үйіне берді. Сондай-ақ жеке кәсіпкерге ескерту алды. Қазіргі таңда «Қорқыт» сауда үйінде жағдай тұрақталды. Жаппай сатылым барысында адам қауіпсіздігін сақтау керектігі туралы сауда нысандарында түсіндірме жұмысы жүргізілуде», – деді Қызылорда облыстық Кәсіпкерлік және өнеркәсіп басқармасының өкілі.
