USD
АСТАНА. 2 қыркүйек. Мемлекет басшысы Қасым-Жомарт Тоқаев бүгін, 2 қыркүйек күні Мұхтар Тілеубердіні Қазақстанның Сыртқы істер министрі етіп тағайындау жөніндегі Жарлыққа қол қойды. Бұл туралы Zakon.kz ақпарына сілтеме жасаған rast.kz хабарлайды.
«Мемлекет басшысының Жарлығымен Мұхтар Бескенұлы Тілеуберді Қазақстан Республикасының Сыртқы істер министрі болып тағайындалды, ол бұрынғы атқарған лауазымынан босатылды», – делінген Ақорданың Telegram арнасында жарияланған ресми ақпаратта.
Мұхтар Бескенұлы Тілеуберді Оңтүстік Қазақстан (қазір – Түркістан) облысында 1968 жылғы 30 маусымда туған. С.М. Киров атындағы Қазақ мемлекеттік университетінің философия-экономика факультетін бітірген, М.В.Ломоносов атындағы Мәскеу мемлекеттік университеті жанындағы Азия және Африка институтында және Йенсе университеті (Корей Республикасы) жанындағы тілдер институтында тәжірибе алған. Оқуды аяқтағаннан кейін Әл-Фараби атындағы ҚазҰУ-дің философия тарихы және қытай филологиясы кафедраларында жұмыс істеген.
Дипломатиялық қызметін 1993 жылы атташе лауазымынан бастады. Орталық аппараттағы жұмыс барысында Азия елдері басқармасының үшінші хатшысы, Азия департаментінің бірінші хатшысы, екіжақты ынтымақтастық департаментінің бөлім бастығы қызметтерін атқарды.
Шетелде Қазақстанның Корей Республикасындағы елшілігінде екінші хатшы және Израиль мемлекетіндегі елшілігінде кеңесші болып жұмыс істеді. Президент Әкімшілігінде Мемлекеттік хатшының сыртқы саясат мәселелер жөніндегі кеңесшісі болды.
2003 жылы Сыртқы істер вице-министрі болып тағайындалды.
2004 жылы еліміздің Малайзиядағы Елшісі және 2005 жылдан бастап Индонезия Республикасы, Бруней Даруссалам және Филиппин Республикасындағы елшісі қызметтерін қоса атқарды.
2009 жылы Қазақстанның Швейцария конфедерациясындағы елшісі болып тағайындалды және Лихтенштейн кінәздігі мен Ватикан мемлекетінде елші қызметін қоса атқарды, сонымен қатар Женевадағы БҰҰ бөлімшесінде және басқа да халықаралық ұйымдарда Қазақстан Республикасының Тұрақты өкілі болды.
2015 жылы Қазақстанның Иерусалимдік Әулие Иоанн егеменді әскери госпитальерлер ордені жанындағы, Родостағы және Мальтадағы қоса атқарушы елшісі болып аккредиттелді.
2016-2019 жылдары Сыртқы істер министрінің бірінші орынбасары болған.
2019 жылғы қыркүйек айында Сыртқы істер министрі лауазымына тағайындалды.
Қазақстанның Аустриядағы елшісі болып тағайындалғанға дейін 2021 жылғы қаңтардан бастап 2023 жылғы сәуір аралығында Премьер-Министрдің орынбасары – Сыртқы істер министрі қызметін атқарды.
Төтенше және Өкілетті елші дипломатиялық дәрежесіне ие.
Ағылшын, корей тілдерін меңгерген.
Бұған дейін Ермек Беделбайұлы Көшербаев Қазақстан Республикасының Қорғаныс министрі лауазымын атқарып келген еді. Ол бұл қызметке 2025 жылғы 26 қыркүйекте тағайындалған болатын.
