USD
АСТАНА. 28 қаңтар. Қазақстанда жемқорлардың аты-жөндерін айдай әлемге паш етіп, тізімін жариялап тұру жоспарланып жатыр. Бұл туралы ҚазТАГ ақпарына сүйенген rast.kz хабарлайды.
Мәселе Мәжіліс жанындағы қоғамдық палатада қаралды. Онда депутаттар палата мүшелерімен және сарапшылармен бірге сыбайлас жемқорлыққа қарсы іс-қимыл мәселелеріне қатысты заң жобасын талқылады. Мұның соңы сыбайлас жемқорлыққа жол берген шенеуніктердің мемлекеттік тізілімін жасау жөнінде ұйғарымға келумен аяқталды.
Отырыс депутат Айдос Сарымның төрағалық етуімен, вице-спикер Дания Еспаеваның қатысуымен өтті. Қатысушыларды Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов заң жобасының нормаларымен таныстырды. Оның айтуынша, ұсынылған түзетулер арқылы сыбайлас жемқорлыққа қарсы саясат тұжырымдамасы ішінара жүзеге асырылып келеді. Негізгі заң жобасы алты бағыттан астам саланы қамтиды. Оның ішінде сыбайлас жемқорлыққа жол берген лауазымды тұлғалардың мемлекеттік тізілімін енгізу, пара ұсыну және уәде беру, сондай-ақ пара алуға, сұрауға немесе талап етуге келісім бергені үшін қылмыстық жауапкершілік және басқалар бар.
Отырыста, тұтастай алғанда, үш Кодекс пен бес заңға өзгерістер мен толықтырулар енгізіліп, Әкімшілік кодекске соған қатысты жоба енгізіліп жатқаны айтылды.
