USD
ЕРЕВАН. 27 тамыз. Армения премьер-министрі Никол Пашинян бұдан былай Ереванның Мәскеуді өзіне стратегиялық әріптес деп есептемейтінін айтты. Бұл туралы The Moscow Times ақпарына сілтеме жасаған rast.kz хабарлайды.
Армения Үкіметтің алдағы бес жылға арналған бағдарламасында Ресеймен қарым-қатынас тұжырымдамасын өзгертті.
Ел премьері Никол Пашинян оны енді стратегиялық серіктес деп санамауға негіз бар екенін мәлімдеді.
«Егер біз қазір «стратегиялық серіктестік» деп жазсақ, Ресей мен ҰҚШҰ неге 2022 жылдың қыркүйегінде қауіпсіздік міндеттемелерін орындамағанын сұрайсыздар», – деп «Интерфакс» Пашинянның мәлімдемесін келтіреді.
2022 жылдың 16 қыркүйегінде Армения Қарулы күштері бас штабының бастығы Эдвард Асрян Әзербайжан армиясының сарбаздары Джермук бағытында ел аумағына басып кірді деп мәлімдеген еді. Армения билігі Мәскеу мен ұжымдық қауіпсіздік шарт ұйымы (ҰҚШҰ) сонда қауіпсіздік саласындағы міндеттемелерін орындамады деп санайды. Армения 2024 жылы ҰҚШҰ-ға қатысуды тоқтатты және ұйымды қаржыландырудан бас тартты. «Армения алдағы бес жылда ҰҚШҰ-ға жұмысқа оралуды жоспарламайды және егер ол ұйымнан шығарылса, қуанады», деді Пашинян 24 тамызда.
«Ресеймен ынтымақтастық теңдестірілген сыртқы саясаттың жаңа жағдайында өзгереді», – делінген Үкімет бағдарламасында.
Бұған дейін Пашинян елдердің қарым-қатынасындағы өзгерістер табиғи процесс екенін айтқан, өйткені Ереван мен Баку арасында бейбітшілік орнаған.
«Армения ең алдымен ЕО-ға қосылуға ресми өтініш беруі керек. Бұл да ауқымды жұмысты қажет ететін процесс», – деді Үкімет басшысы.
