USD
АЛМАТЫ. 30 қыркүйек. Оңтүстік мегаполисте зейнет жасындағы қария өз балаларының мейірімсіздігінен есік алдындағы орындықта түнеп жүруге дейін жетті. Бұл туралы «Астана» телеарнасы хабарлады.
«Алматыда зейнеткер өз балаларының сараңдығынан даладағы орындықты мекен етуге мәжбүр болды. Оны пәтерінен өз қызы айырды. Басқа ересек балаларына қария мүлде керек болмай қалды», – делінген хабарламада.
70 жастағы Александр Холодяев бұдан төрт жыл бұрын қызынан несиесін жауып беруге көмектесуді өтінгенін айтады. Ал қызы мұның өтеуі ретінде әкесіне пәтерін сыйға тартатынын жазып беруді талап етеді. Үлкен кісі келіседі, бірақ қызына пәтерге өзі өлгеннен кейін ғана иелік етуді шарт етіп қояды. Алайда, қызы мұндай сәтті күтіп әуре болып жатпайды, көп ұзамай әкесі тұрып жатқан тұрғын жайды сыртынан 10 млн теңгеге сатып жібереді. Одан түскен ақшаға өзіне қала іргесінен үй сатып алады.
Сөйтіп, жасы 70-ке келген қария үй-күйсіз, далада қаңғып қалады. Бүгінде ол автотұрақтағы күркеде қонып шығып жүрген көрінеді. Күндізгі уақытының көбін бұрынғы пәтерінің терезесі түбіндегі орындықта өткізеді.
Көшеде кезбенің күйін кешіп жүрген қарияны мейірімді көршілері тамақтандырып тұрады. Енді олар бәрі сотқа шығу үшін құжат жинап жүр.
«Оның зейнетақысы азғантай, бар-болғаны 70 мың теңгедей ғана алады. Оның да бір бөлігін кредитіне төлейді, ол көптен бері несиесін қайтарумен келеді. Міне, енді баспанасыз қалды. Біз осыған байланысты мәселе көтеріп, келісімнің дұрыс жасалмағанын нақты атап келтірдік. Соның салдарынан қария үйсіз қалды, оны балалары керек етіп отырған жоқ, ұлы тіпті оған қол да жұмсаған», – дейді көршісі Фая Әубәкірова.
Полициядағылар қызының қолындағы құжаттарына сәйкес, пәтерді сатуға толық құқы болғанын айтады. Ал үйсіз қалған қарияға тәртіп сақшылары азаматтық сотқа шығуды ұсынды.
«Қарияның өз пәтерін қызына сыйлайтынын жазып бергені анықталды, құжат нотариалдық жағынан рәсімделген, осыған байланысты аталмыш оқиға бойынша қылмыстық іс қозғау тоқтатылды», – деп түсіндірді Алматы полиция департаментінің ресми өкілі Салтанат Әзірбек.
Енді Александр Холодяев әділдікті сот арқылы қалпына келтірмекші. Егер пәтерді қайтарып алу мүмкін болмаса, құрығанда тұрғын үйді сатқаннан түскен ақшаның бір бөлігін алуға әрекет жасағысы келеді. Сол сияқты бар баласының алимент төлеп тұруына қол жеткізу ойында бар.
