USD
ЛОНДОН. 27 тамыз. Кремльдің үлкен геосаяси қателігінің салдарынан оның Армениядағы орнын Ұлыбритания алып қойғалы жатыр. Бұл туралы Dialog.ua ақпарына сүйенген rast.kz хабарлайды.
Армения мен Ұлыбритания қарым-қатынастарын стратегиялық серіктестік деңгейіне көтеруге шешім қабылдады, ақырында Ереванның Мәскеу орбитасынан кеткенін растады.
Лондон мен Ереван өзара іс-қимылдың жаңа форматы туралы келісімге келді – екі жақты қарым-қатынастар стратегиялық әріптестік деңгейіне көтеріле түсті. Бұл шешім стратегиялық диалогтың екінші раундынан кейін қабылданды. Мұның жай-жапсарын Хайастан (Армения) сыртқы істер министрлігі өзінің Facebook-тегі ресми аккаунтында жариялады.
Құжатқа сәйкес, Ереван мен Лондон қауіпсіздік пен қорғаныс саласындағы ынтымақтастықты белсенді түрде дамытуға ниетті болып отыр. Жоспарларға жоғары деңгейдегі кездесулер өткізу, әскери атташе алмасу, сондай-ақ киберқауіпсіздікті нығайту және гибридті қауіптермен күресу жөніндегі бірлескен шаралар кіреді.
Экономикалық бағыт та маңызды орын алды. Армения мен Ұлыбритания іскерлік байланыстарды кеңейтіп, елдің инклюзивті дамуына қолдау көрсетіп, реформалар жүргізетінін баса айтты. Тараптар халықаралық қаржы институттарымен жұмысты қоса алғанда, жан-жақты және кеңейтілген әріптестік туралы келісімді дайындау мүмкіндігін де қарастыруда.
Осыдан бірнеше жыл бұрын Армения Ресейдің Оңтүстік Кавказдағы негізгі одақтастарының бірі саналушы еді. Бірақ Кремльдің бірқатар қателіктері тепе-теңдікті түбегейлі өзгертіп жіберді. Мәскеу Армениядағы адал кланның тақтан тайдырылуына және оның орнына демократиялық көзқарастағы Никол Пашинянның билікке келуіне қатты қарсылық көрсетті. Содан кейін Кремль Қарабақ төңірегіндегі қақтығысқа араласудан бас тартып, одақтасын қолдаусыз қалдырды.
Мұның қорытындысы белгілі: Армения Ресейге тәуелділіктен тез кетіп, Батыс елдері арасынан жаңа серіктестер іздестіре бастады. Осы тұрғыда әуелі Франция президенті Эмманюэль Макронның жан-жақты қолдауына тап келді. Енді Ұлыбритания осы мүмкіндіктер терезесін пайдалана отырып, Мәскеудің мұндағы ықпалының барынша әлсірегенін паш етіп, аймақтағы ықпалын күшейтуге жол салды.
Армян-британ қарым-қатынасының жаңа кезеңі Кремль үшін күрделі геосаяси жеңілістің символына айналды, ол тіпті ондаған жылдар бойы ең жақын одақтастары болып саналатын елдердің арасында да өз орнын жоғалтып алды.
Бұған дейін Dialog.ua агенттігі Арменияда Ресей әскери базасы қоршауға алынғанын және РФ әскерлерін елден шығару талаптары қойылғанын жазған болатын.
Трамптың жақында Әзербайжан мен Армения арасындағы тарихи келісімге қол жеткізуі де Кремльдің беделіне орасан зор нұқсан келтірді.
