USD
ЕРЕВАН. 25 тамыз. Армения бас прокуратурасы елдің екінші президенті Роберт Кочарянға қатысты тоғыз эпизодтан тұратын қылмыстық істер жүргізуді қолға алды. Бұл туралы «Новости-Армения» ақпарына сілтеме жасаған rast.kz хабарлайды.
Агенттік бұрынғы президенттің үстінен 24 тамызда бірнеше қылмыстық іс қозғады. Олардың үш эпизоды лауазымдық өкілдігін артық пайдалану, екі эпизоды аса ірі көлемде пара алу және төрт эпизоды ірі көлемдегі ақшаны зытыру, яғни қолма-қол ақшаға айналдыру баптарына арналды.
Қылмыстық қуғындауға тағы тоғыз адам ұшырады. Олардың арасында екінші президенттің үлкен ұлы Седрак Кочарян, Арменияның 2000-2007 жылдардағы премьер-министрі Андраник Маргарян, 2000-2007 жылдардағы қорғаныс министрі Серж Саргсян, Ереванның 2009-2010 жылдардағы мэрі Гагик Бегларян және басқалар бар.
«Сыбайлас жемқорлыққа қарсы комитетінің тексеруі шеңберінде 1998-2008 жылдары Кочарянның мемлекет мүлкін өзімен байланыстағы тұлғалар мен компанияларға тиімді шарттармен, оның ішінде нарықтық құнынан едәуір төмен және жария сауда-саттықсыз беру үшін лауазымдық өкілеттіктерін жеке мүддесі үшін пайдаланғаны анықталды», – делінген ведомство мәлімдемесінде.
Тергеу сондай-ақ бұл мүліктің шығу тегін жасыру және келісімдерге заңды сипат берудің шаралары қабылданғанын айғақтайды. Іс материалдарына Ачарян және Царав Ахбюр көшелері аудандарындағы жер телімдері, «Каскад» кешені жанындағы аумақ, Паронян көшесіндегі жылжымайтын мүлік, «Капутак Севан» шипажайы, теннис спорт мектебінің мүлкі, сондай-ақ Еревандағы Вазген Саркисян және Налбандян көшелеріндегі нысандар тігілген.
Атап айтқанда, бас прокуратура болжамды сызбалардың бірінің нәтижесінде Кочарянға жалпы құны шамамен 2,63 миллиард драма болатын 56 жылжымайтын мүлік берілгенін мәлімдейді.
Тағы бір эпизод «Toyota Yerevan» компаниясына қатысты. Тергеудің болжамы бойынша, компанияның 30%-дық үлесі мемлекеттік жер учаскелерін олардың нарықтық құнынан едәуір төмен бағамен сатып алуға жәрдемдесуі үшін екінші президенттің ұлына пара ретінде берілген.
