USD
МИНСК. 16 қазан. Беларусь президенті Александр Лукашенко белорус солдаттарының Украинада ешкімді өлтірмегенін, әлі де олай жасағысы келіп отырмағанын айтты. Бұл туралы БелТА хабарлады.
Американың NBC телекомпаниясына берген сұхбатында белорус лидері Ресейдің Украина жерінде жүргізіп жатқан «арнайы әскери операциясына» қатысуы жайында берілген сұрақтарға жауап берді.
Президенттен Беларусьтің ресейлік оккупанттар ұйымдастырып жатқан «әскери операцияға» қосылатын-қосылмайтыны жайында сұралды. «Біз, – бұған дейін де талай айтқанмын, – Ресейді жан-жақты қолдап отырғанымызды еске алатын болсақ, әскери операцияға қатысып келеміз. Біздің қолдауымыз батыс шекарамызды, – Польша мен Литваға қатысты айтып отырмын, – Беларусь арқылы Ресейдің ту сыртынан соққы берілмеуі үшін жауып тастағанымызбен айқындалады. Басынан солай болды», – деп атап өтті Лукашенко.
«Бүгінде біздің қатысуымыз ресейліктер мен украиндарды емдеп жатқанымыздан, ресейліктер мен украиндарға тамақ беріп жатқанымыздан, бәрінен бұрын Украинадан қашып келгендерге пана тауып беріп отырғанымыздан көрінеді. Күнінен сондай 400-500 адам келеді. Біз олардың құқықтарын толық қорғап отырмыз, – деді Александр Лукашенко. – Бірақ біз ана жақта ешкімді өлтіріп жатқан жоқпыз және олай жасайын деп те отырғанымыз жоқ. Бізді, біріншіден, ешкім де, нақтысы – Ресей, бұл операцияға қатысуға шақырмайды. Екіншіден, біздің өзіміз де бұған тартылуға ниетті емеспіз. Біз бұл жайында ұдайы айтып келеміз. Шамасы, біздің айтқанымызды ешкім тыңдамайтын болуы керек, сосын осылай сұрай береді. Ол енді – өз шаруаларыңыз».
