USD
ҚЫЗЫЛОРДА. 26 сәуір. Республикалық «Таза Қазақстан» акциясының «Жасыл аймақ» апталығы аясында Қызылорда облысының Арал ауданында бүгін айтарлықтай жарқын жұмыстар жүзеге асырылды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
«Таза Қазақстан» республикалық акциясының «Жасыл аймақ» апталығы аясында аудан көлемінде ағаш көшеттері мен гүл отырғызу жұмыстары жүргізілді. Аталған жұмыстарға мекеме қызметкерлері, ардагерлер мен ерікті жастар атсалысты.
Биылғы маусымда Арал қаласында 3000 түп ағаш отырғызу жоспарланған. Жергілікті жерге төзімді көшеттер таңдап алынды. Аяқ су мәселесі қиындық тудырмас үшін тамшылатып суару әдісі қолданылуда. Бұдан бөлек, орталық көшелерге, демалыс орындарына, саябақтарға гүлдер отырғызылып жатыр. Бүгінгі акцияда қалада 70 түп ағаш, 100 түп гүл көшеттері қондырылды. Сонымен қатар, акция аясында Арал теңізінің құрғаған ұлтанына сексеуіл егу жұмыстары да жүргізілді.
Мемлекет басшысының тапсырмасымен Арал теңізінің құрғаған ұлтанына 1,1 млн гектар жерге сексеуіл екпелерін егу кезең-кезеңімен жүзеге асырылып келеді.
Атап өтетін жайт, осы аптада «Таза Қазақстан» экологиялық науқанының «Жасыл аймақ» апталығы бастау алды. Онда тазалық жұмыстары қолға алынып, көркейту-көгалдандыру шаралары жүргізілетін болады.
