USD
АРАЛ. 7 тамыз. Арал қаласында Мемлекет басшысы жариялаған «Заң мен тәртіп» қағидатын іске асыру аясында Арал ауданында тұрғындармен ақпараттық-түсіндіру кездесуі болып өтті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Жиынды аудан әкімінің орынбасары Нұрахмет Бохаев жүргізді. Кездесуге Қызылорда облысы бойынша экономикалық тергеп-тексеру департаментінің өкілдері қатысып, қаржы пирамидаларының белгілері, алаяқтардың жиі қолданатын тәсілдері және күмәнді инвестициялық жобалардан сақтану жолдары туралы кеңінен түсіндірді.
Шара барысында тұрғындарға жеке қаражаттың қауіпсіздігін қамтамасыз ету, цифрлық алаяқтықтан қорғану және қаржылық шешім қабылдау кезінде сақтық шараларын сақтау жөнінде жан-жақты ақпарат берілді.
Кездесу барысында тұрғындар өздерін толғандырған сауалдарын қойып, мамандардан толыққанды жауап алды. Сондай-ақ заң бұзушылықтардың алдын алуда әр азаматтың жауапкершілігі мен құқықтық мәдениетті қалыптастырудың маңыздылығы ерекше атап өтілді.
Іс-шара соңында қатысушыларға ақпараттық жадынамалар таратылып, күмәнді қаржылық ұсыныстарға сенбеуге және заңсыз әрекеттерге тап болған жағдайда құзырлы органдарға дереу хабарласуға шақырылды.
