USD
АСТАНА. 31 тамыз. Белгілі журналист Ержан Байтілес «Қазақ газеттері» жауапкершілігі шектеулі серіктестігіне бас директор болып тағайындалды. Бұл туралы Kazinform.kz ақпарына сілтеме жасаған rast.kz хабарлайды.
Ержан Айтөреұлы Байтілес 1981 жылы 14 мамырда Қызылорда облысының Шиелі ауданындағы «Еңбекші» ауылында туған. Әл-Фараби атындағы Қазақ ұлттық университетін журналистика мамандығы бойынша бітірген.
Ержан Байтілес еңбек жолын 2001-2005 жылдары «Қазақстан» газетінде тілші болудан бастады. 2005-2008 жылдары республикалық «Ақ жол – Қазақстан» газетінде аға тілші, «Алматы ақшамы» басылымында бөлім меңгерушісі, «Ақшам-ақпарат» тобының жетекшісі болды. 2008-2011 жылдары республикалық «Ана тілі» газеті бас редакторының бірінші орынбасары, 2011-2016 жылдары республикалық «Егемен Қазақстан» газетінің Қызылорда облысындағы меншікті тілшісі, 2018-2019 жылдары «Нұр Отан» партиясы Қызылорда облыстық филиалы төрағасының орынбасары, 2019-2021 жылдары Қазақстан Республикасы Президенті Баспасөз қызметінің сектор меңгерушісі, 2021-2023 жылдары Қазақстан Республикасы Мемлекеттік хатшысы хатшылық бөлімі меңгерушісінің орынбасары болып қызмет атқарды. Ал 2023 жылдың 14 қыркүйегінен жаңа тағайындауға дейін Қазақстан Республикасы Президенті баспасөз хатшысының орынбасары болып келді.
Айта кетейік, бұған дейін «Қазақ газеттері» жауапкершілігі шектеулі сеірктестігін профессор, ҰҒА академигі Дихан Қамзабекұлы 2022 жылдан бері басқарып келген еді. Ол Құрылтай депутаты болып сайлануына байланысты қызметінен босатылды.
