USD
ЛОНДОН. 14 тамыз. Футболдан Қазақстан құрамасының вингері Дастан Сәтбаев ағылшын Премьер-лигасында ойнайтын Лондонның «Челси» клубында өнер көрсетуге ресми түрде мүмкіндік алды. Бұл туралы Masa-media ақпарына сілтеме жасаған rast.kz хабарлайды.
Сөйтіп, Дастан, бұған дейін айтылып келгендей, француздың бірінші (жоғары) лигасында ойнайтын «Страсбур» клубына да, ағылшынның бірінші лигасындағы «Халл Сити» жасағына да жалға берілмейтін болды. Ол команданың негізгі құрамына қабылданды.
Қазақ футболының жас жұлдызы 12 тамыз күні 18 жасқа толды. Тап осы жас мөлшері оған Англия клубына өтуге жол ашып береді. Осыдан кейін ғана ол ағылшын Премьер-лигасында өнер көрсете алады.
Дастанның туған күнінен кейін ол туралы ірі футбол статистикалық ресурстарында өзгерістер пайда болды. Мысалы, Transfermarkt, Flashscore және Sofascore футбол пабликтері оны «Қайрат» командасының ойыншысы ретінде көрсетуді қойып, бірден «Челсидің» сапына кіргізіп қойды. Ресейдің «Футбол на Куличках» интернет-басылымы да бүгіннен бастап осылай көрсетіп, жаза бастады. Бұдан бөлек, ағылшын Премьер-лигасының ресми сайтында Дастан 36-нөмірмен «Челси» сапында көрсетіліп қойыпты.
Дегенмен Лондон клубының ресми сайты да, команданың жанкүйерлер чаты да әзірге қазақстандық футболының бейнесін өз парақшаларында жариялай қойған жоқ.
Айта кететін жайт, Премьер-лиганың 2026/2027 жылғы маусымдағы чемпионаты 21 тамыз күні басталады. Ал «Челси» 24 тамызда Лондонның келесі клубы – «Фулхэммен» қарсыластар алаңында біріншіліктің бірінші ойынын өткізеді.
