USD
ЛЯЙПЦИГ. 28 мамыр. Бүгін түн ортасы ауа ағылшынның «Кристал Пэласы» испанның «Райо Вальеканосын» 1:0 етіп ұтып, УЕФА Конференция лигасының Кубогын жеңіп алды. Бұл туралы «Советский спорт» ақпарына сүйенген rast.kz хабарлайды.
Германияның Ляйпциг қаласының «Ляйпциг» стадионында ойналған матч аса тартысты жағдайда өтті. Алаң үстіндегі тайталасы арбитр белгілеген қосымша 4 минут аяқталып, финалдық ысқырық естілгенше толастамады. Дегенмен, Оливер Гласнердің шәкірттері сәттілікке ие болды. Соның арқасында 51-минутта соғылған голдың артықшылығын ақырына дейін жеткізе алды.
Жалғыз жеңіс добын Лондон клубында ойнайтын француз шабуылшысы Жан-Филипп Матета салды. Сол сәтте «Қырандар» жаппай шабуылға шыққан еді. Алыстан екпіндеп жеткен Уортонның сол жақ бұрышты көздеп ұрған добын Баталья қайтарып үлгерген. Бірақ оған бірден Матета аяғын тоса қойып, дарбазаның торынан бір-ақ шығарды.
Бұдан кейінгі алма-кезек шабуылдар ешқандай нәтиже әкелмеді. Ойынның соңында испандардың табандылығы мен өршілдігі анық байқалды.
Оливер Гласнер осымен өз командасына үшінші трофей алып беріп отыр. Мұның алдында «Кристал Пэлас» оның басшылығымен Англия Кубогы мен Суперкубогын жеңіп алған болатын. Ал УЕФА Кубогына өз тарихында бірінші рет жетті.
Лондонның «Кристал Пэласы» Англия Премьер-лигасында биыл 20 команда арасында 15-орынға тұрақтады, Мадридтің «Райо Вальеканосы» Испания Ла Лигасында 20 жасақ ішінде мәреге 8-ші болып жетті. Ол да осы жолы УЕФА Кубоктарының финалында тұңғыш рет күш сынасты.
