Қырғызстанда президенттікке үміткерлер саны 55-ке жетті

БІШКЕК. 15 қараша. Қырғызстанда 14 қарашаға дейін республика президенттігіне кандидат болып тіркелгендер қатары 55-ке барды. Бұл туралы K-News хабарлады.

Ең соңынан еш жерде жұмыс істемейтін, 1981 жылы 14 сәуірде туған Абакаров Эльдар Курманбекович Орталық сайлау комиссиясына келіп, өзін өзі ұсынды.

Мұның алдында ғана өзін тіркеуді өтініш етіп адвокат Клипачева Елена Сергеевна, республика пауэрлинг федерациясының президенті Керимбеков Бакыт Маканович, Жогорку кенештің бұрынғы депутаты Исабеков Кубанычбек Сатиндиевич, Бішкек көп профильді тау колледжінің аға оқытушысы Искендеров Жеенбек Урудинович, зейнеткер Темишов Базарбай, уақытша жұмыссыздар Суйуналиев Жаныбек Курманканович пен Капаров Чынгыз Капарович дегендер өздерін тіркеу жөнінде өтініш өткізіп қойыпты.

Тіркелгендер арасында бұған дейін президенттің міндетін атқарып келген Садыр Жапаров та бар. Ол осыған байланысты бұл қызметін де, Үкімет басшысы деген лауазымын да қойды.