USD
РИО-ДЕ-ЖАНЕЙРО. 14 сәуір. Бразилиядағы Амазония аймағын мекен ететін байырғы абориген жұрт – үндістердің яномамо тайпасының коронавирустан қырылып кету қаупі төніп тұр. Бұл туралы Globo басылымы хабарлады.
«Амазонияның шалғайдағы аудандарын мекен ететін өркениеттен тыс қалған яномамо тайпасында коронавирус инфекциясын жұқтырып алғандар табылды», – делінген хабарламада.
Басылым жазып отырғандай, тайпаның 15 жастағы бозбаласы вирустан жантәсілім еткен. Оны Боа-Виста қаласындағы аурухананың жансақтау бөлімі аман алып қала алмапты.
Мұны Бразилмя денсаулық сақтау министрі Луис Энрике Мандетта мәлімдеді.
«Иә, шынында тайпа ішінде бірінші оқиға орын алды, бұл бізді алаңдатпай қоймайды. Қалыптасып отырған жағдайда біз сыртқы әлеммен байланыстары аз байырғы қауымдастықтарға айрықша назар аударуымыз керек», – деді ол.
Ақпарға сай, коронавирус Бразилияның 850 мың байырғы халықтары үшін қатерлі болып шығуы ықтимал, себебі, олардың ағзаларында сыртқы ауруларға қарсы иммунитеттер жоқ, сосын медицина қызметкерлері бұл аймақтарға тездетіп жете алмайды.
