USD
НЬЮ-ЙОРК. 6 шілде. Норвегия құрамасының шабуылшысы Эрлинг Холанн Бразилия ұлттық командасы қақпасына екі гол салып, өз командасын ширек финалға шығарды. Бұл туралы «Спорт-Экспресс» ақпарына сілтеме жасаған rast.kz хабарлайды.
Норвегия 2026 жылғы әлем чемпионатының 1/8 финалында Бразилияны 2:1 есебімен жеңді. Матч АҚШ-тағы «Нью-Йорк/Нью-Джерси Стэдиум» аренасында өтті.
Норвегтер сапынан Эрлинг Холанн дубль жасады, ол кездесудің 79 және 90-минуттарда мергендігімен көзге түсті. Ал бразилиялықтар 90+10 минутта ғана жауап қайтара алды. Қосымша уақыттың 10-минутында белгіленген пенальтиді Неймар салды. Ол алаңға 67-минутта ғана шыққан еді.
Бразилия құрамасында бірінші таймда бірінші болып есеп ашу мүмкіндігін жіберіп алды. Оны Бруно Гимараес дұрыс пайдалана алмады. Оның ұрған добын қақпашы қайтарды.
Сонымен, Норвегия жарыс жолын жалғастырды. Ол 12 шілде күні Астана уақыты бойынша сағат 02:00-де ойналатын ширек финалда Англиямен шайқасады. Матч АҚШ-тың Флорида штатына қарасты Майами қаласындағы «Гарденс» стадионында ойналады.
Жасыратыны жоқ, кездесуде Бразилия көп шабуылдаса да, қақпаға тура соққы жасауда қарсыластарынан аса алмады, керісінше, норвегтердің жорықтары өткірлеу шығып жатты.
Осы матчтан кейін Бразилия құрамасының шабуылшысы Неймар өзінің ұлттық командадағы мансабын аяқтағанын жариялады.
«Мен тырысып бақтым, бірақ енді бәрі бітті», – деді ойын соңында көзіне жас алған 34 жастағы футболшы.
Неймар құрама сапында 130 ойынға қатысып, 80 гол соққан, 59 нәтижелі пас берген. Осылайша ол құрама тарихындағы ең көп гол соққан форвард атанған.
Ол 2016 жылы Олимпиада чемпионы болды, 2013 жылы Конфедерациялар Кубогын жеңіп алды, 2021 жылы Америка Кубогының күміс жүлдегері және 2012 жылы Олимпиаданың күміс жүлдегері атанды.
