USD
ТЕРЕҢӨЗЕК. 28 мамыр. Қызылорда облысының Сырдария ауданында «Таза Қазақстан» бағдарламасы аясында кезекті экологиялық шара ұйымдастырылды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Ауданда Мемлекет басшысының бастамасымен жүзеге асырылып жатқан «Таза Қазақстан» республикалық экологиялық бағдарламасы аясында бой көтерген «Таза өлке – таза аула» атты ауқымды экологиялық акция қанат жайды. Шараның басты мақсаты қоршаған ортаны қорғау мәдениетін қалыптастыру, елді мекендердің санитарлық тазалығын сақтау, тұрғындардың табиғатқа деген жанашырлығын арттыру және туған жерге деген жауапкершілік сезімін күшейту болып табылады.
Шараға Тереңөзек кентінің әкімі Нұржан Бисембаев, аудандық ардагерлер кеңесінің төрағасы Мұса Келдібаев және аудандық әжелер кеңесінің төрағасы Ұлмекен Жаналиева, мекеме қызметкерлері, зиялы қауым, азаматтық қоғам өкілдері, жастар, еріктілер және тұрғындар белсене қатысты.
Кент әкімі тазалық мәдениеті мен туған жерге деген құрметтің көрінісі тапқан осындай игі бастамаларға тұрғындардың белсенді қатысуы ауданымыздың көркеюіне үлкен серпін беретінін атап өтті.
Акция барысында аудан көлеміндегі бірқатар аумақтарда санитарлық тазалау жұмыстары жүргізіліп, көшелер мен қоғамдық орындар қоқыстан тазартылды. Сонымен қатар ағаш көшеттері отырғызылып, көгалдандыру және абаттандыру жұмыстары жүзеге асырылды.
«Таза өлке – таза аула» акциясы – Сырдария ауданындағы тазалық пен тәртіпті сақтау бағытындағы жүйелі жұмыстардың жалғасы.
Осындай игі бастамалар тұрғындардың экологиялық мәдениетін арттырып қана қоймай, туған жерге деген сүйіспеншілік пен жанашырлықты нығайта түседі.
