USD
ТЕРЕҢӨЗЕК. 23 шілде. Қызылорда облысы Сырдария ауданына қарасты Ақжарма елді мекенінің тұрғындары бүгіннен бастап табиғи газды тұтына бастады. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Қызылорда облысының әкімі Мұрат Ергешбаев Сырдария ауданына жұмыс сапары кезінде «Ақжарма» ауылындағы газ қосу рәсіміне қатысты.
Салтанатты шарада аймақ басшысы ауыл тұрғындарын көптен күткен игіліктің іске асуымен құттықтап, ізгі тілегін білдірді.
«Мемлекет басшысы ауылдарға инфрақұрылым жеткізуге ерекше көңіл бөлуде. Бүгін Сіздер көптен күткен, ауыл халқының тұрмыс-тіршілігіне жаңа тыныс беретін табиғи газ қосуға жиналдық. Бұл жобаға бюджеттен 1,8 млрд теңгеден астам қаржы бөлінді. Өткен жылы «Нағи Ілиясов», «Шаған» ауылдарына газ қосылып, ел игілігін көруде. Алдағы уақытта да бұл бағыттағы жұмыстар жалғасын табады. Егемен еліміз еңселі, Тәуелсіздігіміз тұғырлы болғай!», – деді облыс әкімі.
Рәсімнен кейін Мұрат Ергешбаев ауыл тұрғындарының үйлеріне барып, естелік сыйлықтар тапсырды.
Сыр бойында 2022 жылдан бері 65 млрд теңгеден астам қаржыға 77 газдандыру жобасы іске қосылды. Нәтижесінде облыс халқын газдандыру деңгейі 83 пайызға жетті. Биыл жыл соңына дейін 10 елді мекенге «көгілдір отын» қосылып, қамту деңгейі 85 пайызға көтеріледі.
Жақын күндері Сырдария ауданына қарасты «Шіркейлі», «Қоғалыкөл» және «Бесарық» ауылдарын газдандыру басталады.
Сапар барысында облыс басшысы «Ақжарма», «Шаған», «Іңкәрдария», «Нағи Ілиясов», «Шіркейлі» ауылдарының тұрғындарымен кездесті. Онда ауданның әлеуметтік-экономикалық дамуы туралы айтылып, жиналған жұртшылық ұсыныс-пікірлерін ортаға салды.
