Талғат Байсуфинов ұлттық құраманың бас бапкері болып бекітілді
АСТАНА. 28 қаңтар. Белгілі маман Талғат Байсуфинов Қазақстан ұлттық футбол құрамасының бас жаттықтырушысы болып тағайындалды. Бұл туралы Orda.kz ақпарына сүйенген rast.kz хабарлайды.
Қазақстан футбол федерациясы ел құрамасының бас жаттықтрушысы болып Талғат Мәруанұлы Байсуфиновтың тағайындалғанын ресми түрде жария етті.
Бұған дейін Талғат Байсуфинов біраз уақыт Қазақстан құрамасының бас жаттықтырушысы міндетін уақытша атқарушы болып келді. Оның жетекшілігімен команда 2026 жылғы әлем чемпионатының іріктеу кезеңінде бірнеше матч өткізді. Атап айтқанда, Қазақстан терме жамағаты Лихтенштейнді (4:0) жеңіп, Солтүстік Македониямен (1:1) және Бельгиямен (1:1) тең түсті.
«Талғат Байсуфинов 2016–2017 және 2020–2022 жылдары Қазақстан ұлттық құрамасының бас бапкері қызметін екі рет атқарған. Сондай-ақ ол отандық бірнеше футбол клубтарын жаттықтырды: «Есіл-Батыр» (Петропавл), «Ақсу», «Ертіс» (Павлодар), «Ақжайық» (Орал). Бұдан бөлек, Қазақстанның жастар құрамасымен де жұмыс істеген» деп жазылған ҚФФ жарияланымында.
Талғат Байсуфинов 1968 жылы 4 қыркүйекте футбол дәстүрі қашанда ерекше болған Павлодар қаласында дүниеге келген. Ойыншы ретінде мансабын ол жартылай қорғаушы ретінде бастады. 1992 жылдың маусымында Байсуфинов Қазақстан ұлттық құрамасының Түрікменстанға қарсы алғашқы ресми матчында алаңға шықты.
1990 жылдардың соңында ойын мансабын аяқтап, өзі туып-өскен Павлодарда жаттықтырушылық қызметке кірісті. Ол алдымен жергілікті команданың қосалқы құрамымен жұмыс істеді, содан кейін негізгі командада бас жаттықтырушының көмекші болды, соңынан бас жаттықтырушы болып бекітілді. 2008-2014 жылдары «Ертісті» басқарып, клубты жаңа деңгейге көтерді. Оның командасы тұрақты ойнады, 2010 жылы Қазақстан чемпионатының қола жүлдесін және 2012 жылы күміс жүлдені жеңіп алды, сөйтіп, еурокубоктарға шықты.
Футболшы ретіндегі мансабында «Ертіс», «Металлург», «Еңбек», «Екібастұз», «Жетісу» және «Восток» клубтарының намысын қорғады.
Еске сала кетейік, былтыр қыркүйекте ол Қазақстан ұлттық құрамасына уақытша жаңа бапкер болып тағайындалған еді.
Тағы бір жайт, Талғат Байсуфинов Қазақстан ұлттық құрамасын 2016-2017 және 2020-2022 жылдары екі рет басқарған болатын.
