USD
МАДРИД. 13 шілде. Испанияның бұрынғы премьер-министрі, консерватор Мариано Рахой Франция құрамасында «француздар жоқ» екенін айтып, қоғам тарапынан қатты қарсылыққа тап болды. Бұл туралы Deutsche Welle (DW) ақпарына сүйенген rast.kz хабарлайды.
Көпшілік қазір әлем чемпионатына қатысып жатқан Франция құрама командасы сапында жергілікті француз миллетінің өкілдерінен гөрі қара нәсілді футболшылардың көп екенін меңзеген испан үкіметінің бұрынғы басшысының сөзінен расизм мен ксенофобияның салқынын көріп жатыр.
Жанжалға Мариано Рахойдың испанның El Debate онлайн-басылымына 10 шілде күні жариялаған бағаны себеп болды. Онда экс-премьер 15 шілдеге қараған түнде өтетін жартылай финалдық матчта испандармен кездескелі тұрған Франция құрамасы жайлы ойын ортаға салады. Ол бұл команданың қаһарлы қарсылас екенін айта отырып, оның құрамында «бірде-бір француз ойыншысы жоқ» деп салды.
Испанияның іс басындағы үкімет басшысы, социалист Педро Санчес өзінің ізашарын осы сөзі үшін қатты сынға алады.
«Елдердің азаматтарын ата-тектеріне, туған жерлері мен терісінің түсіне қарай анықтайтындар әлі күнге дейін бар. Басқалар болса, оның елге жақындығының деңгейі мен оның өмірін жақсартуға қосқан үлестеріне қарай өлшейді, – деп жазды Санчес Х әлеуметтік желісінде. – Испания – өзінің игілігі жолында кім еңбек етсе, соныкі. Өзінің ксенофобиялық сөздерімен елді масқаралап жүргендердікі емес. Ал Франциямен жартылай финалда кездесеміз. Кім күшті – сол жеңсін, тек расизм жеңіліске ұшырайды».
Санческе Испанияның көлік министрі Оскар Пуэнте де қосылды. Ол 1939-1975 жылдары Испанияның диктаторы болған Франсиско Франконың оңшыл авторитарлық режимін еске түсіріп, Рахойды «пост-франколық нақұрыс» деп атады.
Испан экс-премьерінің сөзі Францияда да үлкен резонанс шақырды. Елдің ішкі істер министрі Лоран Нуньес BFMTV телеарнасына берген сұхбатында Рахойдың сөзін «басқа сыймайтын былшыл» деп бағалады. Бұдан басқа да сынап жатқандар аз емес.
Францияның Мадридтегі елшілігі әлеуметтік желілерде: «Франция құрамасының барлық футболшылары – француздар. 26 ойыншының 23-і Францияда туған. Сыртта туған үшеуі де – француздар» деп жазды.
