USD
ҚАРАҒАНДЫ. 16 қараша. Белгілі футболшы, жаттықтырушы Серік Бердалин 79-ға қараған шағында өмірден өтті. Бұл туралы Қарағанды «Шахтері» баспасөз қызметінің дерегіне сүйенген rast.kz хабарлайды.
Бүгін, 16 қараша күні Қазақстанның еңбек сіңірген жаттықтырушысы, Қазақстан спортына еңбегі сіңген қайраткер, республиканың 1995 жылғы үздік жаттықтырушысы, Қазақстан ұлттық құрамасының бұрынғы жаттықтырушысы, Қарағандының «Шахтер», Теміртаудың «Металлург» («Строитель») командаларының бұрынғы ойыншысы Серік Бердалиннің ұзаққа созылған науқастан кейін жантәсілім еткені белгілі болды.
Серік Сәрсенбайұлы Бердалин 1947 жылы 6 шілдеде Қарағанды қаласында туған. Қарағанды футбол мектебінің түлегі. Футболмен 12 жасынан бастап жаттықтырушы Андрей Гумировтың қарауында кеншілер командасының мектебінде айналыса бастаған. Әуелгіде шабуылшы, кейін қорғаушы амплуасында ойнады.
Ол 1965 жылдан Қарағандының «Шахтер» командасының қосалқы құрамына алынды. 1966 жылы команда сапында «А» класында 3 ойын өткізіп, 1 гол соқты. 1967-1970 жылдары «Б» класында ойнайтын Теміртаудың «Металлург» («Строитель») командасы құрамында өнер көрсетіп, 25 голдың авторы атанды. 1973 жылы «Шахтерге» оралып, 1975 жылы мансабын аяқтағанға дейін 92 рет қорғаушы рөлінде алаңға шығып, 3 гол соқты. Осы жылдары команда сапында үздік өнер көрсеткен 4 қазақ жігітінің де есімдері «Серік» болып еді. Олар КСРО спорт шебері Серік Әшірбеков, Серік Ысқақов, Серік Көсембаев және Серік Бердалин болатын.
Серік Сәрсенбайұлы футболшылық өмір жолын тәмамдағаннан кейін, 1976-1980 жылдары «Шахтердің» дайындық тобының аға жаттықтырушысы, 1980-1985 жылдары «Шахтер» клубының бастығы, 1985-1990 жылдары Қарағандыдағы №3 спорт интерната аға жаттықтырушы, 1990-1997 жылдары «Шахтер» клубының президенті, соның ішінде 1991, 1992-1993, 1995-1996, 2000 жылдары команданың бас жаттықтырушысы, 1998 жылы Павлодардың «Ертіс» командасының бас жаттықтырушысы, 2000 жылдың маусым айына дейін Талдықорғанның «Жетісу» командасының бас жаттықтырушысы, 2000-2003 жылдары Көкшетаудың «Есіл» командасының аға жаттықтырушысы, 2003-2008 жылдары республикалық мемлекеттік жаттықтырушы, 2009 жылы «Шахтердің» оқу-тәрбие жөніндегі жаттықтырушысы болды.
Бердалиннің қарауында «Шахтер» 1995 жылы, «Ертіс» 1998 жылы Қазақстан чемпионатының қола жүлдегері атанды. Ол 1995-1996 жылдары «Шахтер» командасымен бірге Қазақстан құрамасының бас жаттықтырушысы қызметін қоса атқарды. Оның тұсында республика терме жамағаты 20 ойын өткізіп, оның 6-ында ұтты, 10 рет жеңілді, 4 матчты тең аяқтады.
Бүгін, міне, қазақ футболын дамытуға елеулі үлес қосқан ардагер арамыздан кетіп бара жатыр. Біз марқұмның отбасына, жұбайы Ларисаға, ұлдары Тимур мен Даниярға қайғыларына ортақтасып, көңіл айтамыз.
Бақұл бол, ардақты аға!
Марқұмды жерлеу рәсімі 18 қараша, сейсенбі күні өтеді
