USD
АЛМАТЫ. 15 мамыр. Алматыда бейпіл сөздерді боратып, жергілікті қызмет көрсету органдарын жерден алып, жерге салған шетелдік азаматша қамауға алынды. Бұл туралы rast.kz хабарлайды.
Алматы қалалық ішкі істер департаментінің баяндауынша, орыс тілінде боғауыз сөздерді қарша боратып, онда өзбектерді де кемсітіп өткен ресейлік қызға 10 тәулік қамау жазасы белгіленді. Оған бүгін, 15 мамыр күні өткен сот процесінде қоғамдық тәртіпті бұзды деген айып тағылды.
«Алматы қаласының мамандандырылған ауданаралық әкімшілік сотының шешімімен құқық бұзушы 10 тәулікке әкімшілік қамауға алынды», – делінген хабарламада.
Сот барысында айыпталушының 1998 жылы 11 қазанда туған Ирина Игоревна Куликовская есімді азаматша екені анықталды. Ол Қазақстанға жұмыс істеу үшін келіпті.
Жанжал 14 мамыр күні ресейлік бойжеткеннің Instagram әлеуметтік желісінің мониторында жүргізген хабары тарауынан туындады. Онда шетелдік азаматша Қазақстанда құжат рәсімдеудің салғырттығына қатты ренжігенін, ондағылар төрешіл екенін айтып, біраз былапыт сөздердің иегін ағытады. Айтуынша, Алматыда банк картасын ашу үшін ЖСН алу, резидент емес мәртебесін растау секілді бірнеше мекеме арасында сабылуға тура келген.
Желі қолданушыларының ашуын қоздырған басты мәселе оның өзін Ресейдегі өзбек мигранттарымен салыстыруы болды.
«Екінші күн қатарынан шетелдік банк картасын алу үшін құжат жинадым. Өзімді Ресейдегі өзбек сияқты сезініп жүрмін. Мені ары-бері жібереді, біресе «сіз резидент емессіз» дейді. Футбол добындай әр мекеме бір-біріне сілтеп отыр», – дейді ол сөздерін боқтықпен тұздықтап.
Алматы қалалық полиция департаменті әлеуметтік желідегі бейәдеп балағат сөздер қоғамдық орында айтылған әрекет ретінде бағаланғанын мәлімдеді. Іс «Ұсақ бұзақылық» бабы бойынша сотқа жолданған.
