USD
АСТАНА. 6 қыркүйек. Қазақста Ұлттық қауіпсіздік комитеті (ҰҚК) өзбекстандық профессордың тыңшылық әрекеттеріне қатысты қамауға алынғанын растады. Бұл туралы Bugin-media.kz ақпарына сілтеме жасаған rast.kz хабарлайды.
Қазақстан Ұлттық қауіпсіздік комитеті өзбекстандық профессор Икболжон Қорабоевтың ұсталуына байланысты Өзбекстан тарапы дипломатиялық арналар арқылы ресми түрде хабардар етілгенін мәлімдеді.
Комитет Қазақстан Қылмыстық-процессуалдық кодексінің 201-бабына сілтеме жасап, сотқа дейінгі тергеп-тексеру деректері жария етілмейтінін жеткізді.
«ҚР заңнамасына сәйкес, Өзбекстан тарапы дипломатиялық арналар арқылы ресми түрде хабардар етілді», – делінген ҰҚК жауабында.
Алайда Қорабоевтың процестік мәртебесін, істің қай бап бойынша тергеліп жатқанын және оған қандай күдік тағылғанын нақтыламады.
BBC бұған дейін 46 жастағы Өзбекстан азаматы Икболжон Қорабоевтың 3 шілдеден бері Астанада қамауда отырғанын жазған болатын. Басылымның мәліметінше, ол Мақсұт Нәрікбаев университетінде халықаралық қатынастар пәнінен сабақ берген.
Профессордың туыстары Би-си-си (BBC) радиосына оны тыңшылық жасады деген күдікпен ұсталғанын айтқан. Бірақ ҰҚК бұл ақпаратты ресми түрде растаған жоқ және қылмыстық істің бабы туралы түсініктеме бермеді.
Қорабоев ұсталғанға дейін халықаралық қатынастар, өңірлік интеграция және маңызды минералды ресурстар тақырыбында зерттеулер жүргізген. BBC жазуынша, оның соңғы еңбектерінің бірі Қазақстан мен Өзбекстандағы маңызды минералдарға қатысты құқықтық және саяси саясатты салыстыруға арналған, бірақ бұл зерттеу әлі жарияланбаған.
