Қорғаныс министрлігі әскери қызметкерлердің жаппай кетіп жатқанына алаң

АСТАНА. 30 қаңтар. Қорғаныс министрлігі кадрлық офицерлердің Қарулы күштер қатарынан жаппай кетушілігі белең алғанына алаңдап отыр. Бұл туралы Baq.kz ақпарына сүйенген rast.kz хабарлайды.

Қазақстан Республикасы Қорғаныс министрінің бірінші орынбасары – Қарулы Күштер Бас шатабының бастығы Сұлтан Қамалетдинов Мәжілісте өткен комитет отырысында Қарулы күштердің қазіргі жағдайы жайлы кеңінен айтып берді. Ол алаңдататын мәселе бар екенін айтып, статистикалық мәліметтерді алға тартты.

Әскери қызметшілердің әскерден жаппай кетуі ерекше алаңдатады. Жыл сайын олардың саны азаймай келеді. «2020-2023 жылдар аралығының өзінде Қарулы күштерден 17 065 әскери қызметші босатылды, оның ішінде 4 301 офицер және келісімшарт бойынша 12 764 әскери қызметші бар. Салыстырып қарасақ, бұл шамамен 15 бригаданың санына тең», – деді министрдің орынбасары Мәжілісте.

Деректерге сүйенсек, соңғы 3 жылда мынадай әскерилер қызметтен кеткен:

– 4 301 офицер;

– Келісімшарт бойынша 12 764 әскери;

– Денсаулық жағдайы және шекті жасқа жетуі бойынша – 5 289, оның ішінде 1 926 офицер;

– Келісімшарт бойынша 3 363 әскери қызметші;

– Басқа себептер бойынша– 11 776, оның ішінде 2 375 офицер.

– Келісімшарт бойынша 9 401 әскери қызметші.

Сұлтан Қамалетдинов атап өткендей, бүгінде армияны әскери қызметкерлермен қамтамасыз ету кәсіби дайындалған кадрлардың жоғалуын өтемейтінін ескеру қажет. Осы кезеңде Қарулы күштер қатарына 14 311 әскери қызметші қосылған.