USD
СТОКГОЛЬМ. 9 қаңтар. Швеция армиясының бас қолбасшысы Микаэль Бюден Ресей армиясымен соғысқа дайындала бастау керек екенін елдің есіне салды. Бұл туралы The Moscow News ақпарына сүйенген rast.kz хабарлайды.
Атап айтқанда, Швеция Қарулы күштерінің жоғарғы қолбасшысы Микаэль Бюден мен Швецияның азаматтық қорғаныс министрі Карл-Оскар Булин азаматтарды өз елдері үшін 200 жылдан астам уақытқа созылған бейбітшілік кезеңіне малданып отыра бермей, соғысқа дайын болуға үндеді. Олар жаһандық қақтығыс қаупінің біртіндеп жақындап келе жатқанына назар аударды. Жыл сайынғы дәстүрлі folk och Försvar қорғаныс конференциясында сөйлеген сөзінде Булин әлемдегі, тіпті Швециядағы да бейбіт өмірдің «өзгермейтін тұрақты» емес екенін, керісінше бұлай болжау «бұрынғыдан да қауіпті» екенін атап өтті.
Булин қарулы қақтығыстың орын алуы сөз болатын нәрсе деп санамайды, бірақ Швецияның дәстүрлі бейбітшілік мәртебесіне қарамастан, елді соғыс өртінің шарпуы ықтималд екенін жоққа шығармайды. Ол ел тұрғындарын жалпы қорғанысты нығайтуға қатысуға шақырды. Ал Бюден Булиннің ескертуін жөн деп есептеп, жағдайға байыпты қарау керектігін және қоғамды ықтимал сын-қатерлерге дайындау қажеттілігін баяндады.
«Жеке деңгейде сіз моральдық тұрғыдан дайындалуыңыз керек […]. Қазіргі сөз мұны түсінгеннен бөлек іске де көшу керектігі жайында болып отыр», – деді Бюден. Ол НАТО-ға кіру процесін бастан кешіп отырған Швецияның бұл миссияны тезірек атқарып шыққаны аса маңызды екенін алға тартты.
Азаматтық қорғаныс министрі баспана нүктелерін сақадай сай етуді және оларды жедел жабдықтауды бұйырды. Сондай-ақ, жұмысшыларға жұмыс берушіден жұмыс орнында әскери қорғанысты ұйымдастырудағы рөлі қандай болатынын білуге және қиын жағдайда жұмысты жалғастыру үшін не қажет болатынын ойлауға кеңес берді.
Булин Азаматтарға 2022 жылдың ақпанында Ресейдің басып кіруіне өре қарсы көтерілген Украина тұрғындарын еске салды. Ол азаматтық қорғаныстың жай теориялық жаттығу болып қалмауы керектігін атап өтті. Өз сөзінің соңында Булин Үкімет деңгейінде әрекет ету қажеттілігіне тоқталып, «тез жасалатын барлық нәрсе тез жасалуы тиіс» деп мәлімдеді.
