Пашинян РФ телеарналарын елдің шырқын бұзуға әрекет етеді деп айыптады
ЕРЕВАН. 25 қараша. Армения премьер-министрі Никол Пашинян ресейлік телеарналарды хай елінің тыныштығын бұзып, тұрақтылығына қауіп төндіріп отырғаны үшін сынға алды. Бұл туралы The Moscow News дерегіне сүйенген rast.kz хабарлайды.
Үкімет басшысы Армениядан хабар тарататын ресейлік телеарналардың армян жұртының ішкі ісіиен араласып, ондағы саяси ахуалды ушықтыруға әрекет жасайды деп мәлімдеді.
Оның айтуынша, Мәскеу мен Ереван арасындағы үкімет аралық келісімнің талаптары РФ тарапынан осылай қасақана өрескел бұзылып жатыр.
«Келісімге сай, елдің ішкі істеріне араласуға, ішкі саяси ахуалды тұрақсыздандыруға бағытталатын қадамдарға ешқандай жол берілмеуі тиіс. Соңғы айларда біздің мемлекеттік мекемелер бұл келісім талаптарының бұзылуынан туған бірнеше нақтылы мәселелерді анықтады», – деді Пашинян.
Ол жоғары технологиялар министрлігінің аталған мәселе бойынша және белгілі бір шешім шығару үшін Ресей тарапының өкілдерін шақырып отырғанын атап өтті.
Хайастанда Қарабақтағы соғыс жанжалы өрши түскен тұстан Ресей телеарналарын желіден ажырату мәселесі ұдайы көтеріліп келеді. Армения парламентіндегі «Азаматтық келісім» фракциясының депутаты Лусине Бадалян мұның бір себебі елдің қауіпсіздігіне қауіп төндіретін «армяндарға қарсы» контенттің пайда болуы екенін атап өтті.
Ал Пашинян аппаратының басшысы Араик Артюнян Ресей бұқаралық ақпарат құралдарының Арменияға қарсы «гибридтік» соғыстың басталып кеткенін баяндады. Ол РФ телеарналарының нағыз құдай атып кеткен «ең оңбаған насихатшылары» RT бас редакторы Маргарита Симоньян мен оның күйеуі Тигран Кеосян, Life арнасын құрушы Арам Габрелянов пен «Говорит Москва» радиосының бас редакторы Роман Бабаян секілді ұлты армян азаматтары болып отырғанына назар аударды.
Ресей телеарналары хабарларын таратуға тыйым салу жайы Қазақстанда да біраздан бері талқыланып келеді. «Қазақстанның көптеген азаматтарын Ресей пропагандасы жалықтырып бітті. Біздің өзімізде сол насихатты жүргізетін отандастырымыз аз емес. Сондықтан бірқатар өңірлерде ара-тұра ұлт аралық мәселелер туындап жатады», – деп мәлімдеген еді қыркүйек айында Қазақстан Мәжілісінің депутаты Мақсат Толықбай.
Алайда республикада әзірге Ресей ТВ-ларын көруге мүмкіндік беретін тек Sputnik24 сайты ғана бұғатталып тұр. Бұған, Arbat Media порталының мәнбесі мәліметінше, «Қазақстан Республикасының аумағында лицензиясы жоқ телерадио хабарларын тарату операторларының заңсыз жұмыстары» себеп болған.
