Пригожиннің ұшағы таңертең Минскідегі әскери аэродромға келіп қонды
МИНСК. 27 маусым. Ресейлік «Вагнер» ЖӘК-тің негізін қалаушы Евгений Пригожиннің бизнес-джеті бүгін таңертең Минск қаласына келгені белгілі болды. Бұл туралы «Белсат» дерегіне сүйенген rast.kz хабарлайды.
«Беларускі Гаюн» телеграм-каналының хабарлауынша, RA-02795 тіркеу нөмірлі ұшақ бүгін, 27 маусым күні таңертең 07:40 сағатта Минск түбіндегі «Мачулищи» әскери аэродромына келіп қонған.
Алайда бұл әуе кемесінің ішінде Евгений Пригожиннің болған-болмағаны белгісіз.
Мұның алдында біз Ресейде федералды қауіпсіздік қызметінің «Вагнердің» командирі үстінен қозғалған қылмыстық істі қолға алып, тергеуді бастап кеткенін жазғанбыз. Сол сияқты Пригожиннің осы күндері Мәскеу облысының «Железнедорожный» елді мекенінде орналасқан №35533 әскери бөлім территориясындағы арнайы оқшаулағышта қамауда отырғанын да баяндаған болатынбыз.
Пригожиннің ұшағымен бірге Ресейден тағы бір лайнер – RA-02878 тіркеу нөмірі бар Вае 125 – 800В бизнес-джеті ұшып келген. Ол Санкт-Петербургтен ұшып шығып, 07:58 сағатта «Мачулищиге» келіп жеткен.
Ресейдің «ЧВК-ОГПУ» телеграм-каналы 26 маусым күні кешке «Вагнер» ЖӘК колоннасының Беларусь территориясына кіріп қойғанын хабарлаған еді. Бірақ басқа мәнбелер мұны әзір растай қойған жоқ.
Ал Евгений Пригожиннің Беларуське баратынын 24 маусым күні кешке «Вагнер» колоннасы Мәскеуге 200 шақырым қалғанда жорығын тоқтатып, келген ізімен кері қарай қайта бастаған кезде Путиннің жазарманы Дмитрий Песков мәлімдеген болатын.
Ресей диктаторы Владимир Путин кеше, 26 маусым күні екі кештің арасында эфирге шығып, 5 минуттық үндеуін оқып тұрғанында бүлікке қатысқандардың бәріне де Ресейден кетіп қалуға рұқсат берілетінін айтты.
«Кетем дегендердің бәрі Белауське кете берсін», – деді Путин.
Сондай-ақ 26 маусым күні Ресейдің «Вёрстка» басылымы өзінің Беларусьтің Осипович қаласы түбіндегі орман шаруашылығындағы мәнбесіне сілтеме жасап, сол жерде «Вагнер» ЖӘК содырларына арналған әскери лагерь салынып жатқанын баяндады.
