Путин: Менің еврей достарым Зеленьскийді «еврей халқының қоры» дейді
САНКТ-ПЕТЕРБУРГ. 16 маусым. Бүгін ашылған Петербург халықаралық экономикалық форумының пленарлық отырысында РФ президенті Владимир Путин осындай мәлімдеме жасады. Бұл туралы ТАСС ақпарына сілтеме жасаған rast.kz хабарлайды.
Кремльдің қожайыны форумның күн тәртібіне ешбір қатысы болмаса да, отырыста Украина президенті Володимир Зеленьскийге тиісіп өтуді жөн санапты.
«Украина құрмет тұғырына батыр ретінде Гитлердің ізбасарларын алып келді», – деді ол салған жерден. Бұдан әрі өзінің еврей достарының украин лидері хақында не дейтінін айтты.
«Менің еврей достарым көп, бала жастан. Олар: «Зеленьский – еврей емес. Ол – еврей халқының масқарасы» дейді», – деп қаңғалақтады Мәскеудің патшасы. Осыдан кейін залдағы жұрт қол шапалақтады. «Бұл әзіл де емес, келеке де емес, өйткені, құрмет тұғырына Украинаның батырлары ретінде бүгінгі неонацистер, Гитлердің күшіктері келді», – деп тағы тантып кетті.
Міне, әлемде империя құруды армандап жүрген мемлекет басшысының деңгейі осындай енді!
Диктатор сосын бұған Ресейдің нацизммен күресте бәрінен көп зардап шеккенін қосып қойды.
Ол «Ресей Украинада пайда болған неонацизммен күресуге міндетті» деп есептейді. Мына жерде сонысын тағы қайталады.
Ресей көсемі келесі кезекте Екінші дүниежүзілік соғыс кезінде еврейлерді қыруға арналған Холокост оқиғасына тоқталды. Сол кезеңде 6 млн еврейдің жойылып кеткенін айта келіп: «1,5 миллион еврей Украинада жойып жіберілді, олардың бәрі дерлік бандерашылар қолымен жасалды», – деді Путин.
Ол форумда осындай әңгіменің болатынын күткенін баяндай келіп, кеше кешке Мәскеуге қоңырау шалып, Украинадағы нацистердің бұл тұрғыда айтқандары жайлы материалдар жіберуді өтінгенін мәлімдеді.
Осыны айтқан Путин бірнеше парақ шығарып, соларда жазылған сөздерді оқып берді. «Ярослав Стецько деген біреу, Украин ұлтшылдары ұйымы Бандера фракциясының басшысы, 1939 жылы былай деп жазады: «Мәскеу мен жөйттік – Украинаның ең үлкен жаулары. Украинаның жөйттерді өлтіруде және еврейлікпен күресте неміс тәсілдеріне көшуі керек екенін табанды түрде жеткіземін». Тағы бір қайраткер – бұл енді 1941 жылдың шілдесі, – «Арыстан қасапшы» деп аталатын Степан Ленкавский деген біреу: «Жөйттерді толық жойып жіберуге қатысты барлық тәсілдерді қабылдаймыз», – деп жазған екен.
«Немене бұл?» деп ашу көтерді Путин осы жерде.
Бұдан әрі ол Екінші дүниежүзілік соғыс кезінде Украинаның қай жерінде еврей балаларының көптеп өлтірілгені жайында есеп беріп кетті.
Ал Украинаның қарсы шабуылы турасында сөз қозғағанда, Ресей әскерлерінің оларға «төтеп беріп» тұрғанын шаттана айтып тұрды.
Шамасы, майдан даласы хақындағы мәліметтерінің шындыққа оншалықты жуыса бермейтінін өзі де білмейтін болса керек.
Еске сала кетейік, Қазақстан Президенті Қасым-Жомарт Тоқаев бұдан бірнеше күн алдын бұл форумға қатыспайтынын ресми түрде мәлімдеген болатын.
