USD
МӘСКЕУ. 5 мамыр. «Вагнер» жеке әскери компаниясының негізін қалаушы Евгений Пригожин 10 мамыр күні майдан даласынан шығатындарын баяндады. Бұл туралы ресейлік ресурстар деректеріне сілтеме жасаған rast.kz хабарлайды.
Осыған байланысты «Путиннің аспазы» РФ бас қолбасшысына (Путин), қорғаныс министріне (Шойгу) видеоүндеу жолдады.
Оның өз әскерлері снаряд тапшылығын көріп келе жатқанын айтып, дабыл қаққанына біраз уақыт болып қалды.
«Вагнер» жеке әскери компаниясының жалдамалылары «снаряд аштығы» салдарынан 10 мамырда Бахмутты қалдырып, «жараларын жалау үшін» тылға аттанады», – деп мәлімдеді Евгений Пригожин.
«Мен ресми түрде хабарлаймын: менің жігіттерім Бахмутта оқ-дәрісіз қырыла бермейтін болады. Сондықтан 10 мамыр күні біз Бахмут елді мекенінен шығамыз. Бізге 45 шақырымнан қалғаны екі шақырымдай ғана еді. Бірақ егер ресейліктерді Бахмуттың алынғанымен қуантқыларың келмесе, онда бұл – өз проблемаларың», – деді ол.
Пригожиннің айтуынша, вагнершілер 9 мамырға қарай Бахмутты басып алмақшы болған екен, алайда «әскерилер маңайындағы тоңмойындар» іс жүзінде «біздің мұны жасай алмауымыз үшін» 1 мамырдан бері оқ-дәрі жеткізіп тұруды мүлде тоқтатқан.
«Жалдамалылар оқ-дәрінің жоқтығынан «мағынасыз өлімге» ұшырар еді», – деп атап өтті Пригожин.
Ол сондай-ақ жауынгерлерінің Ресей халықтары жеңіс күніне дақ түсірмеу үшін 9 мамырға дейін ғана соғысты жалғастыратынын, содан кейін кететіндерін баяндады.
Айтуынша, ЖӘК содырлары қазірге дейін майдан шебінде 400 күн болған. Команда 2022 жылдың 19 наурызынан бері осында жүр.
Пригожин Қорғаныс министрлігінің өздерін қасақана «снаряд аштығына» отырғызып қойғанын айтты. «Қоймаларда толып жатқан оқ-дәрілерді бергізбей, бізді әдейі тапшылыққа душар етіп отыр. Біз өзімізге қажетті мөлшердің 30 пайызын ғана алып тұрдық, сондықтан шығынымыз көп болды», – деді ол.
ЖӘК Бахмуттан кеткеннен кейін тылдағы лагерьде тынығады. «Ресей халқының қажетіне керек болғанша сонда отырамыз», – деді Пригожин.
https://youtu.be/jWfnymua0Gg
Бұдан бұрын Пригожиннің баспасөз қызметі «Вагнер» ЖӘК құрылтайшысы ондағн жауынгер мәйітінің жанында тұрып, Ресейдің әскери басшылығын боқтап тұрған видеоны жариялаған болатын.
