БҰҰ Ресейдің украин балаларын депортациялауын қылмыс деп таныды
НЬЮ-ЙОРК. 17 наурыз. Біріккен Ұлттар Ұйымы Ресейдің Украинадан кішкентай балаларды депортациялап, өз еліне әкетуін соғыс қылмысы деп бағалады. Бұл туралы шетел ақпарат құралдарына сілтеме жасаған rast.kz хабарлайды.
«Ресейдің украин балаларын өздерінің бақылауындағы территорияларға зорлықпен әкетіп, еріксіз орналастыруы соғыс қылмысы болып табылады», – делінген БҰҰ-ның Украинадағы адам құқығы бұзылуын тексеру жөніндегі комиссиясының баяндамасында.
Комиссия Донецк, Харьков және Херсон облыстарынан әкетілген жастары 4-тен 18-ге дейінгі 164 баланың басынан өткен жағдайлармен танысты.
Комиссия Ресейдің мұндай шараларды ұрыс қимылдары кезінде ата-аналарынан айырылған немесе уақытша байланыстары үзілген балаларға қатысты қолданған деген тұжырымға келді.
Халықаралық гуманитарлық құқық қарулы қақтығысты жасаушы тараптың балаларды эвакуациялап әкетуіне тыйым салады. Бұл тек балаларға шұғыл медициналық көмек беру немесе олардың қауіпсіздіктерін қамтамасыз етудің қажеттілігі туған кезде ғана мүмкін болады.
БҰҰ комиссиясы Ресейде жоғарыда атап көрсетілгендей балаларды алып кетіп, өз территориясына орналастыруға рұқсат етілетін ахуалдың бірде-бірі болмағанын атап көрсетті.
Киевтің мәліметі бойынша, Ресей соғыс жылдарында 16 221 украин баласын алып кеткен.
Ескерту!
rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады. Плагиат жасаушы «Авторлық құқық туралы» Заңға сәйкес қудаланады.
