USD
МЕЛЬБУРН. 28 қаңтар. Қазақстандық теннисші Елена Рыбакина бүгін Австралияның ашық чемпионаты финалында жеңіліске ұшырап, екінші орынды қанағат тұтуға мәжбүр болды. Бұл туралы Sports.kz хабарлады.
Біздің спортшының бұл жолғы қарсыласы белорус Арина Соболенко болды. Бірінші сетте Елена басым түсті – 6:4. Бірақ екінші сетте оның қарсыласы күштілік көрсетті, есеп – 6:3.
Шешуші партияда WTA рейтингісінде 5-ші болып тұрған Соболенко дес бере қоймады. Ол 6:4 есебімен жеңіске жетті.
Финалдық кездесу тура 2 сағат 29 минутқа созылды.
Айта кетейік, Уимблдон-2022 турнирінің жеңімпазы Елена Рыбакина чемпионатта «Үлкен шлем» турнирлерінің үш чемпионы – Ига Свёнтекті (Польша), Елена Остапенконы (Латвия) және Виктория Азаренконы (Беларусь) қатарынан ұтқан болатын.
2016 жылы Рио-де-Жанейрода өткен Олимпиялық ойындардың чемпионы Елена Веснина финалдық шайқас жайлы өз ойын білдірді және белорус спортшысының қалай жеңіске жеткенін айтты.
«Australian Open-дегі әйелдер финалы керемет өтті, мұндай матчтарды көрудің өзі бір ғанибет. Екі теннисші де бүгін титулды жеңіп алуға лайықты болды, екеуі де ғажап теннис көрсетті. Арина сәл сенімдірек және байсалды ойнады. Бұлардың өзара кездесулерінде Соболенко алда тұр еді, есеп 3:0, бұл финалда да оның әуелден өз артықшылықтары болды. Арина бірінші сеттен кейін ойынына сұмдық қарқын қосты. Ол доп беруде өте сенімді ойнады, соққының күшін де айтарлықтай арттырып жіберді. Ал Рыбакинаға мұндай қарқынға ілесу өте қиынға соқты. Соболенко өте қуатты вариативті ойынды ұсынды. Бұл турнирде ол өзінің жылдам комбинацияларымен қарсыластарын корттан жұлып түсіріп жатты. Осындай екпін екінші және үшінші сеттерде айқын көрінді. Мен Аринаны атағымен құттықтаймын, ол жарады!», – деді ол.
