USD
МӘСКЕУ. 24 қаңтар. Кремль мобилизация жүріп жатуына байланысты Ресей Федерациясының азаматтығын алған мигранттарға тарихи отандарына баруларына тыйым салды. Бұл туралы «Азаттық радиосы» хабарлады.
Әңгіме жақын арада натурализация жасалып, РФ азаматтығын алған ТМД елдерінен шыққан мигранттар жайында болып отыр. Кейінгі кездері Қырғызстан мен Тәжікстаннан келгендер туып-өскен жерлеріне кетпек болғанда, шекарада олардың жолдары кесілген.
«Ресей шекарашылары маған биязы түрде «сіз мибилизация тізіміне енгенсіз, сондықтан 12 ақпанға дейін шекараның арғы жағына шығуға құқыңыз жоқ» дегенді түсіндіріп айтты», – дейді солардың бірі радио тілшісіне. Басқа мәнбелердің мәліметтерінше, натурализацияланған мигранттарға қазіргі күндері әскерге шақыру қағаздары да келіп жатқанға ұқсайды. Олардың кейбірі әскери комиссариаттарға шақырылып, ескерту де алған. Куәлардың айтуларынша, Орталық Азиядан шыққан ресейлік паспорттары бар мигранттар аэропорттарда, теміржол вокзалдарында ұсталып жатқан көрінеді.
Бішкек осы кезде Ресейдің паспорты бар бұрынғы отандастарына мобилизация жағдайында ештеңемен көмектесе алмайтынын ашып айтты. Ресейдің Қырғызстанмен қос азаматтық жөнінде келісімі жоқ, сондықтан Кремль бұрынғы қырғызстандық азаматтардың кезінде өз тарихи отанының тұрғыны болғандарына қарамайды.
Ресей Тергеу комитетінің басшысы Александр Бастрыкин 13 қаңтарда натурализация жасалған азаматтардың Украинада соғысуы керек екенін мәлімдеген болатын. Енді олар мобилизациядан ешқайда қашып құтыла алмайды. Әлдеқандай жолмен тарихи отандарына кетіп қалған күнде де, Ресейге қайтып оралуға, сөйтіп, соғысқа аттануға мәжбүр болады.
