Қайрат Сатыбалдының ұшағынан 1,5 млрд доллар табылған

АСТАНА. 19 мамыр. Назарбаевтар әулетінің бір мүшесі – Қайрат Сатыбалды ұсталған кезде оның ұшағы ішінен 1,5 миллиард доллар ақша табылғаны белгілі болды. Бұл туралы Orda.kz хабарлады.

Нұрсұлтан Назарбаевтың туған інісі – Сатыбалдының үлкен ұлы Қайрат биылғы 13 наурызда Дубайға шұғыл ұшып кетіп қалғалы тұрған жерінен Алматы аэропортында тоқтатылған еді. Артынша оның лауазымдық өкілеттіктерін асыра пайдалану және қаржы жымқыру фактілері бойынша қамауға алынғаны белгілі болды.

Ал қазір Антикордың Сатыбалды басқаратын «ЦТС» серіктестігінің президентін ұстағаны туралы хабар тарады. Сыбайлас жемқорлыққа қарсы іс-қимыл агенттігінің қызметкерлері «Көлікке қызмет көрсету орталығы» АҚ президенті Ғайни Бекетовтен бөлек, «Темір Триумф» кәсіпорнының акционері Мұрат Мұхамеджанұлын да құлып астына отырғызған.

Құқық қорғау органдарының қызметкерлері «Қазақстан темір жолы» басшыларына қатысты «ЦТС» серіктестігінің акцияларын арзандатылған бағамен сату фактісі бойынша қозғалған қылмыстық істі тергеуге кірісті.

Биылғы 20 сәуірде Көлікке қызмет көрсету орталығының 100 пайыз акциясы сыйға тарту шарты бойынша мемлекет меншігіне қайтарылды.