Кадыровшылар күн сайын өте көп шығынға ұшырап жатыр
КИЕВ. 15 мамыр. РФ армиясы құрамында шайқасып жүрген Шешенстан әскери бөлімшелері күн сайын көптеген сарбаздарынан айырылып қалуда. Бұл туралы «Украинская правда» хабарлады.
«Кадыровшылар күн сайын соғыста зор шығынға ұшырауда, бірақ оны әскери командование мұқият жасырып бағып отыр», – делінген хабарламада.
Ресей журналистері Шешенстан басшысы Рамзан Кадыровқа бағынатын бөлімшелердің күн сайын көптеген жауынгерлерінің қаза тауып, жараланып қалып, қатардан шығып жатқанын мойындады. Бірақ мұның бәрі PR-технология арқылы мұқият жабылып-жасырылып жатыр.
Ресейдің «Важные истории» басылымының журналистері Шешенстан билігіндегі мәнбелер мен қаза тапқандардың туыстары деректеріне сүйене отырып, мұның бәрін паш етіп тастады.
Шынында Ресей әскерилерінің Украинада ұшырап жатқан шығындары соғыс басталған алғашқы күннен қатты жасырылып, барынша төмендетіліп көрсетіліп келеді.
Мұндай жасырушылықтың Кадыров сарбаздарына да қатысы бар. Сол себеппен Ресейдің ресми мәліметі тек 13 шешен жауынгері ғана оққа ұшты деп беріп отыр. Ал онымен көрші Дағыстаннан 123 сарбаз қаза тапты деседі…
Украина бас барлау басқармасы Украинаға басып кірген РФ армиясы қатарында 2,5 мыңға жуық Шешенстан жауынгерлерінің болғанын анықтады.
«Былай қарағанда, жауынгерлік машықтары мен рухтары жоғары сияқты болып көрінетін, жақсы жабдықталған 2,5 мың Кадыровтың тиктокер жалдамалыларының 100-ге жуығы, – тіпті белсенді ұрыс қимылдарына қатысып жүрмесе де, – осы кезге дейін жер жастанды, 300-ге жуығы жарақат алып қалды және 600-ден астамы қару-жарақтары мен киім-кешектерін тастап, Украинадан қашып кетті», – делінген хабарламада.
Барлау Кадыров содырларының Украинаға шабуылдың екінші эшалонында келіп, тек тұрғын үйлерді тексерумен, кепілге алынғандар мен бейбіт тұрғындарға зәбір берумен, үйлер мен сауда орындарын тонаумен және қиратумен айналысқанын баяндайды. Одан қалды, украин әскерлері тастап кеткен елді мекендер мен нысандардың фондарында суретке және видеоға түсіп, тиктокерлік пиармен әуестенеді.
Кейін кадыровшыларға соғыстың алдыңғы шебінен қашқан ресейлік солдаттарды атып тастау тапсырылды.
Қазіргі таңда Шешенстаннан келген оккупанттар Луганск және Мариуполь бағыттарына қоныс теуіп алып, елді мекендерді тонаумен және өздерінің «ерліктері» жайлы сюжеттерді TikTok арқылы көрсету үшін роликтерге түсумен әуре болып жүр.
