Жаңалықтар жаңғырығыТіршілік

Әйел қатты ұйқыдан тұрғасын 20 жылдық жадынан айрылып қалды

ЛОНДОН. 31 қаңтар. Англияның Эссекс графтығындағы Брейнтри қаласында тұратын бір әйел кешке ұйқыға жатты да, оянғасын соңғы 20 жылдағы оқиғаларын ұмытып қалды. Бұл туралы New York Post хабарлады.

Қазір жасы 43-ке келіп отырған Клэо Маффетс-Рис болашақ күйеуі Скоттпен 1995 жылы пабта танысады. Содан бері бірге тұрып келген. Екеуі 2008 жылы ресми түрде үйленеді. Олардың қазір Джек және Макс деген екі ұлы бар.

Клэр журналист болып қызмет істеген екен. Сонымен бірге, балаларының тәрбиесімен де түбегейлі айналысыпты.

Бірақ 2021 олардың өмірлері күрт өзгеріп кетеді. Әйел бір күні кешке өзін өте нашар сезінеді де, төсекке ерте жатып қалады. Ол Макстың тұмауы жұққан екен деп ойлайды.

Келесі күні таңертең ұлы оны оятпақшы болып, біраз жұлқылайды. Бірақ әйел қыңқ етпестен жата береді. Содан кейін ол ауруханаға жатқызылып, өкпеге жасанды желдету аппаратына (ИВЛ) қойылады. Кейінірек арнайы клиникаға ауыстырылады.

Невропатологияда бірнеше рет анализ алынғаннан кейін айрықша пациенттің миы энцефалиттен зақымданған деген шешім шығарылады. Осыдан кейін оның күйеуі мен туған-туыстарына «жаман жағдайға дайындала беріңдер» деген хабар беріледі. Алайда, жасалған ем оған әсер ете бастайды. Сөйтіп, 16 күннен кейін ИВЛ-дан ажыратылады.

«Менің оянғаннан кейінгі бірінші сұрағым «Мысықтардың жағдайы қалай?» деген болды», – дейді ағылшын әйел. Оған мысықтардың бірі бұдан көп жыл алдын мәңгіге ұйықтатылып тасталғаны, екіншісі бір апта бұрын өз ауруынан өлгені жеткізіледі. Содан кейін ғана Маффет-Рис өзінің ұмыт болған соңғы 20 жылдық өміріне ептеп саңылау кіре бастағанын айтады.

Әйел енді өзінің барлық туыстары мен таныстарын тани бастайды, бірақ көп оқиғаларды естен шығарып алғаны байқалады. Скотт оған екеуінің тойы мен бірге демалған сәттеріндегі суреттерін көрсетеді. Мұның бәрін Клэр ұмытып қалған болып шықты. Дәрігерлер бұл кейіпті энцефалиттен кейінгі ахуал деп түсіндіреді. Енді оның жады қайтып оралатынына сенім жоқ.

«Мен күйеуімнің құшағында тұрғанымда одан ағатайым Майклдың бұдан үш ай бұрын обырдан, ағатайым Питердің жеті жыл бұрын жүрек талмасынан, немере бауырым Тэштің 2018 жылы кенеттен  қайтыс болғандарын естіп, еңіреп жыладым», – дейді әйел. Ол кезінде бұлардың бәрінің жаназаларына қатысқан екен, бірақ ұйқыдан оянғаннан кейін ұмытып қалыпты.

Ауруханада бес апта жатқаннан кейін Клэр шығарылған, сөйтіп, ұлдарымен қауышқан. Ол кеселханада жатқанда, пандемия салдарынан аналарымен жолығуға рұқсат етілмеген.

 

Тағы көрсету

Пікір қалдыру

Ұқсас мақалалар

Back to top button