USD
КАБУЛ. 19 тамыз. Ауғанстан вице-президенті Амрулла Салех өзін мемлекет басшысы деп жариялап, халықты тәліптермен соғысуға шақырды. Бұл туралы РБК хабарлады.
«Ауғанстан вице-президенті Амрулла Салех өзінің Twitter-інде президент Ашраф Гани елден қашып кеткеннен кейін өзі мемлекет басшысы болып табылатынын мәлімдеді. Салех ел тұрғындарын «Талибан» қозғалысының содырларына қарсылық көрсетуге шақырды», – делінген хабарламада.
«Мен қазір елдемін және президенттің міндетін атқарамын. Ауғанстан Конституциясы бойынша, мемлекет басшысы қашып кеткен, отставкаға шыққан немесе қайтыс болған жағдайда елді вице-президент басқарады», – деп жазды Салех.
Ол сондай-ақ ауғандықтардың Ауғанстанның – Оңтүстік Вьетнам бола алмайтынын, ал тәліптердің вьетконгтерге (Вьетнамның оңтүстік бөлігінен Америка әскерлері кеткеннен кейін соған иелік еткен партизан) тіпті ешбір жақын келмейтіндерін дәлелдеуге тиіс екендерін атап өтті. «АҚШ пен НАТО-дан айырмашылығымыз, біз рух күшін жоғалтқан жоқпыз және болашағымыздың жарқын болатынын көріп тұрмыз. Қарсылық қозғалысына қосылыңыздар», – деп ой тарқатты вице-президент.
