USD
БРЮССЕЛЬ. 8 шілде. Халықаралық Euronews телеарнасы бірінші рет қазақ тілінде хабар таратуға кірісті. Бұл туралы Exclusive.kz ақпарына сілтеме жасаған rast.kz хабарлайды.
Мұның жайы Президент Қасым-Жомарт Тоқаевтың 7 шілде күні Euronews медиа желісінің басшысы Педро Варгас Давидпен кездесуі барысында белгілі болды. Тараптар Қазақстанның жетістіктерін әлемдік ақпарат кеңістігінде кеңінен таныстыру, сондай-ақ Брюссельге жасалған сапардың нәтижелері мен екіжақты стратегиялық серіктестікті дамыту мәселелерін талқылады.
Кездесуде әлемнің жетекші телеарналарының бірі саналатын корпорациямен ынтымақтастықты кеңейту перспективасы ортаға салынды.
Мемлекет басшысы Euronews уақиғаларды бейтарап жариялап, көрерменге сенімді ақпарат ұсынатын жаһандағы алдыңғы қатарлы медиа ресурс ретінде танылғанын атап өтті.
Қасым-Жомарт Тоқаевтың айтуынша, телеарна 2024 жылы Астанада өңірлік кеңсесін ашқан сәттен бастап, Қазақстан мен Орталық Азияның саяси, экономикалық және мәдени тыныс-тіршілігі жайында көбірек хабар тарата бастаған.
Мемлекет басшысының айтуынша, әлемнің ең ірі ақпарат телеарналары бірінің қазақ тілінде хабар таратуы оның Қазақстанмен ынтымақтастықты дамытуының басты кезеңдерінің бірі болып саналады.
Педро Варгас Давидтың айтуына қарағанда, қазақ тілі Орталық Азия елдері арасында Euronews жүйесіне қосылған бірінші тіл болып отыр.
Кездесу барысында сондай-ақ Қазақстан Президентінің таяуда Брюссельге жасаған ресми сапарының нәтижелері жөнінде пікір алмасу өтті.
Педро Варгас Давид Президент Қасым-Жомарт Тоқаевтың сапар қарсаңында Euronews сайтында жарық көрген мақаласындағы Астана мен Еуропа одағының кеңейтілген стратегиялық серіктестігінің келешегі туралы түйінді ойларын еуропалық аудитория ерекше ықыласпен қабылдағанын айтты.
Еуропа сарапшыларының пікірінше, Еуропа одағы менн Қазақстан арасындағы қарым-қатынас жоғары қарқынмен дамып, ұзақ мерзімді әрі жемісті ынтымақтастықтың бұрын-соңды болмаған сипатына ие болған.
Әңгімелесу барысында аймақты жаһандық ақпарат кеңістігіне шығарып, Қазақстанның жетістіктерін халықаралық қоғамдастыққа кеңінен таныстыруға мүмкіндік беретін бірлескен бастамаларды жүзеге асыру мәселелері қарастырылды.
