USD
ҚАРАҒАНДЫ. 3 қазан. Қарағандыда қазақтар мен мұсылмандарға қатысты балағат сөздер айтқан Алика Мұхамадиеваның ісі тергеуден кейін сотқа өтті. Бұл туралы ҚазТАГ ақпарына сүйенген rast.kz хабарлайды.
«Қазақтарды қорлағаны үшін әлеуметтік желіде үлкен шу көтерілгеннен кейін қылмыстық жауапқа тартылған Қарағанды қаласы тұрғынының ісі сотқа жеткізілді», – делінген ҚазТАГ хабарламасында.
Қазақстан Республикасы Қылмыстық кодексінің 174-бабының 1-бөлігі (Әлеуметтік, ұлттық, рулық, нәсілдік, діни араздықты қоздыру) бойынша екі мыңнан жеті мың айлық есептік көрсеткішке дейінгі (АЕК) айыппұл салуға, не екі жылдан жеті жылға дейінгі мерзімге бас бостандығын шектеуге не сол мерзімге бас бостандығынан айыруға жататын жазаға тартатын іс сотқа жіберілді.
Іс Қазыбек би аудандық қылмыстық істер жөніндегі сотында судья Арғын Құтышевтың қарауында жатыр. Негізгі тыңдау 14 қазанға белгіленген.
ҚазТАГ бұған дейін Қарағанды облыстық полиция департаментінің қызметкерлері әлеуметтік желіге мониторинг жүргізу барысында әлеуметтік желі қолданушысының ұлтаралық араздықты қоздырғанын анықтағанын хабарлады. ҚР ҚК-нің 174-бабының 1-бөлігімен қылмыстық іс қозғалып, күдікті уақытша ұстау оқшаулағышына қамалды.
Тергеудің болжамы бойынша, 22 жастағы қарағандылық Threads әлеуметтік желісінде ұлтаралық араздық элементтері бар хабарлама жариялаған. Содан кейін полиция күдіктінің дереу қамауға алынуын оның елден кетіп қалмақ болған әрекетіне байланысты болғанымен түсіндірді.
Алика Мұхамадиева – қарағандылық кәсіпкер, сәлемдеме жеткізу бизнесі мен киім дүкенінің иесі. Ол этникалық араздықты қоздырады деп саналатын Threads сайтында жанжалды пікірлер жазғаннан кейін танымал болды. Оның бұл мәлімдемесі қазақ жұртшылығының ашу-ызасын тудырды. Артынша ол кешірім сұраған видеоға түсірді, бірақ бұл қоғамдық айыптауды және оған қарсы қылмыстық істі тоқтата алмады.
