USD
КИЕВ. 23 қаңтар. Украинаның бұрынғы премьер-министрі Николай Азаров Қазақстандағы көтерілістің шығуына АҚШ себепкер дегенді білдірді. Бұл туралы Украина.ру хабарлады.
Русофил саясаткердің байламынша, посткеңестік елдерде русофобияның қайта-қайта бұрқ етіп жатуына Батыстың қосып жүрген үлес аз емес көрінеді. Ол қазақ жеріндегі көтерілістің де бұдан тысқары емес екенін айтты.
«Бұл бұлқыныстардың, бұл қозғалыстардың бәрін осында арнайы жіберілетін батыстың кураторлары ұйымдастырады. Мұны осылай тану керек. Біреулер мұны анда-мұнда құда-жекжаттық, тайпалы қатынастар жайлап алғаннан болды дегілері келеді… Бірақ бір мезгілде 9 облыс орталығының тұрғындарын бірден көшеге айдап шығарған қандай сәйкестік? Мұны стихиялы деп айтуға болмайды, бұл әбден ойластырылған акция. Ұйықтап жатқан жәшік болсын, ояу жәшік болсын, оларды біреу арнайы дайындап, жаттықтырып, қаржыландырды ғой», – деп сайрады жемқор экс-президент Януковичпен бірге Украинадан қуылып кеткен экс-премьер.
Азаров Қазақстанда тамыр-таныстық, жекжат-құдалық қатынастардың үлкен рөл атқаратынын атап өтті және оны қазіргі басты болмағанмен, негізгі проблемалардың бірі екенін, мұны сосын әлдекімдердің пайдаланып кеткенін атап өтті.
«Алғашқы себептің арнайы қызмет орындарының жұмысы болуы мүмкін, бұған Түркияның қатысы барын да жоққа шығармаймын, себебі, онда пантүркизм идеологиясы бар, бірақ, бірінші кезекке әлемде 800 базасы бар америкалықтарды қоямын. Өз елінен сырт жерде 800 базасы бар басқа мемлекетті тауып беріңізші. Сөйте тұра, олар барлық жерде Ресейді басқыншы деп атап көрсетеді. Таңғаларлық. Жалпы, бәрі Оруэлл бойынша жүріп жатыр», – деп гөйтті сосын саясаткер.
Біз мұны дұрыс пікір деген оймен емес, мұндайда басқа жұрттың қалай лаға беретінін білсін деген ниетпен жариялап отырмыз.
