USD
ТҮРКІСТАН. 8 ақпан. Түркістанда екі баласын бірдей өлтіріп тастады деген күдікке іліккен келіншек Шиеліде мұғалім болып істейді екен. Бұл туралы «Халық үні» ақпарына сүйенген rast.kz хабарлайды.
Қанды оқиға 7 ақпан күні Түркістан қаласында орын алған. Осындағы жалдамалы пәтерлердің бірінен екі сәбидің өлі денесі табылған.
Облыстық полиция департаментінің мәліметінше, осы оқиға бойынша жедел-тергеу іс-шарасы жүргізілген. Жедел уәкілдер күдіктіні Шымкенттегі мейманханалардың бірінде қолға түсірген.
Екі баласының өліміне күдікті деп танылған азаматша бұған дейін диспансерлік есепте тұрмаған. Ұжым, ата-ана және оқушылармен қарым-қатынасы бірқалыпты болған.
Dalanews.kz сайтының жазуынша, әйел Қызылорда облысының Шиелі кентіндегі А.С.Пушкин атындағы N46 мектеп-лицейде 2014 жылдан бері тәрбиеші болып жұмыс істеп келген. Мұны Шиелі аудандық білім бөлімі растаған.
Бұл деректі Қызылорда облыстық білім басқармасының басшысы Асқарбек Есжанов та расқа шығарды.
«Түркістан қаласында болған балалар өліміне қатысты күдікті деп танылған азаматша оқиға болған 7 ақпан күні жұмысқа бармаған. Мектеп әкімшілігіне бұл жөнінде ескертпеген. Мектеп әкімшілігі ол азаматшаның ұжым, ата-аналар және оқушылармен тіл табысуы, жайлы мінезімен ерекшеленгенін айтады. Сондай-ақ педагогикалық қызметінде балаларды оқыту мен тәрбиелеуде бірқатар жетістікке жеткен. Тиісті алғыс хаттармен марапатталған. Әріптестерінің айтуынша, мінезінде ешқандай ауытқу болмаған. Қандай да бір диспансерлік есепте тұрмайды. Өзі толыққанды отбасы, ата-енесі, жұбайымен бірге тұрған. Қазір ішкі істер органдарында бұл бойынша қылмыстық іс тіркелген. Қорытындысы тергеу амалдарынан кейін белгілі болады», – деді басқарма басшысы.
«Адам өлтіру дерегі бойынша барлық мән-жайды анықтау мақсатында тергеу жүргізіліп жатыр. Тиісті сараптамалар тағайындалды. Күдікті әйел қамауға алынды. Істің тергеу барысы менің жеке бақылауымда», – деп мәлімдеді Түркістан облысы полиция департаментінің бастығы Мұрат Қабденов.
