USD
ТҮРКІСТАН. 15 мамыр. Оңтүстік Қазақстан облысының орталығы – Түркістан қаласында Өзбекстан тарапының салуымен тұрғызылған мешіттің ашылу салтанаты орын алды. Бұл туралы kun.uz ақпарына сүйенген rast.kz хабарлайды.
Түркістанға Түркі мемлекеттері бейресми саммитіне қатысуға келген Өзбекстан президенті Шавкат Мирзиёев Қазақстан президенті Қасым-Жомарт Тоқаевпен бірге аталмыш мешітке арнайы ат басын бұрды.
Кешеннің жалпы ауданы 7 гектардан асады, ал құрылымның өзі бір мезгілде 5 мыңнан астам адамды сыйғыза алады. Керемет ансамбльде 70 метрлік төрт мұнара және негізгі залы мен дәстүрлі айвандары бар үш қабатты ғимарат бар.
Ислам және шығыс сәулетінің үздік дәстүрлерінде орындалған мешіттің сәулеті ұлттық ою-өрнектерді, Шығыс күмбездерін, биік мұнаралар мен заманауи құрылыс шешімдерін үйлесімді үйлестіреді. Интерьер ислам каллиграфиясы мен сәндік өнер элементтерімен безендірілген.
4,2 гектар аумақты абаттандыруға ерекше назар аударылды. Мұнда жасыл аймақтар, жаяу жүргіншілер жолдары, демалыс орындары, жарықтандыру жүйелері, сәндік элементтер мен субұрқақтар жасалады.
Өзбекстанның бауырлас Қазақстан халқына және Түркістан тұрғындарына сыйы ретінде салынған бұл керемет кешен екі елдің ғасырлар бойғы достығы мен мәдени жақындығының, тату көршілігі мен одақтастығының жарқын бейнесіне айналғаны атап өтілді.
Құран мен дұға сүрелері бауырлас халықтардың бейбітшілігі мен өркендеуі үшін оқылды.
Айта кететін жайт, бейресми саммитке ТМҰ-ға мүше мемлекеттердің басшылары – Әзербайжан президенті Ильхам Әлиев, Қазақстан президенті Қасым-Жомарт Тоқаев, Қырғызстан президенті Садыр Жапаров, Өзбекстан президенті Шавкат Мирзиёев және Түркия президенті Режеп Тайып Ердоған, сонымен қатар ұйымға бақылаушы елдердің өкілдері, ұйымның бас хатшысы, ақсақалдар кеңесі мен түркі ынтымақтастық ұйымдарының жетекшілері қатысты.
Қазақстанның төрағалығы аясында ұйымдастырылған Түркістандағы бейресми саммиттің негізгі тақырыбы цифрлық даму мен жасанды интеллект мәселелеріне арналды. Кейінгі жылдары ТМҰ аясында Түркі инвестициялық қоры, DEPA, TURANSEZ, e-Permit, e-CMR, TURKUNIB және «Цифрлық Жібек жолы» сынды бастамалар қолға алынған. Бұл жобалар өзара сауда, инвестиция, көлік-логистика, цифрлық инфрақұрылым, білім және технологиялық интеграцияны күшейтуді көздейді.
Бейресми саммит қарсаңында Астанаға мемлекеттік сапармен келген түрік президенті Ердоғанмен Қазақстан президенті Тоқаев келіссөз жүргізіп, екі ел бірқатар келісім-шартқа қол қойды. Ол құжаттардың арасында екі тарап бірге дрон жасау, мұнай-газ жобаларын бірлесіп жүзеге асыру туралы келісімдер туралы ерекше айта кетуге болады.
14 мамыр күні Астанада өткен Қазақстан-Түркия стратегиялық ынтымақтастық кеңесінің алтыншы отырысында екі тарап энергетика, қорғаныс, сауда-саттық, мәдени-ағарту және логистика мәселелерін талқылады.
Тоқаев Ердоғаны Қазақстанда жаңадан тағайындалған жоғары мемлекеттік награда – «Қожа Ахмет Ясауи» орденімен марапаттады.
