USD
УАШИНГТОН. 30 қазан. АҚШ президенті Дональд Трамп өз елінің Кореяның әскери-теңіз күштері үшін ядролық сүңгуір қайық жасап беретінін мәлімдеді. Бұл туралы DW ақпарына сүйенген rast.kz хабарлайды.
Қазіргі уақытта әлемде тек алты елде ғана ядролық сүңгуір қайықтар бар. Солтүстік Корея да өздерінде осындай орасан зор кеменің бар екенін айғақтады.
АҚШ президенті Дональд Трамп Сеулге сапары кезінде Корея үшін ядролық сүңгуір қайық салып беретіндерін жариялады. «Біздің әскери одақ қазір бұрынғыдан да күшті. Сондықтан мен оларға қазіргі уақытта қолданылып жүрген ескі және маневр жасауға қолайсыздау дизельді сүңгуір қайықтардың орнына ядролық сүңгуір қайық жасап беруге рұқсат еттім», – деп жазды Трамп 29 қазан күні TruthSocial әлеуметтік медиа платформасында.
АҚШ президенті «Оңтүстік Корея өзінің ядролық сүңгуір қайығын Филадельфия кеме жасау зауыттарында жасайды» деп нақтылап айтты. Қазіргі таңда әлемде АҚШ, Ресей, Ұлыбритания, Франция, Қытай және Үндістан секілді 6 елде ғана ядролық сүңгуір қайықтар жұмыс істейді. Басқа бірнеше ел мұндай субмариндерді қазір жасап жатыр. Ал Солтүстік Корея билігі ондай кеменің өздерінде бар екенін атап көрсетті.
Дональд Трамп сонымен қатар Кореяның АҚШ тарифтерін төмендету үшін Уашингтонға 350 миллиард доллар өзара төлем төлеуге келіскенін баяндады. Трамп бұл тарифтерді сәуір айында жариялады, бастапқыда алым 25% деп белгіленген болатын. Сеул сонда Құрама Штаттар алдында тарихи қарыздары бар екеніне байланысты АҚШ-тың баж салығына қайтарма жауап жасамайтынын мәлімдеді.
«Олар біздің мұнайымыз бен газымызды көп мөлшерде сатып алуға келісті. Ал кореялық бай компаниялар мен бизнесмендердің біздің елімізге салатын инвестициясы 600 миллиард доллардан асады», – дегенді қосты сосын АҚШ президенті.
