USD
МӘСКЕУ. 16 маусым. Белгілі тәжік-кеңес футболшысы және жаттықтырушы Владимир Гулямайдаров кеше, 15 маусым күні 81 жасында қайтыс болды. Бұл туралы тәжіктің Asia-plus порталы ақпарына сүйенген rast.kz хабарлайды.
«Тәжікстан тарихындағы ең көрнекті футболшылардың бірі Владимир Алексеевич (Алиппоевич) Гулямхайдаров 15 маусымда 81 жасқа қараған шағында Мәскеуде өмірден өтті. Оның есімі тек қана тәжік емес, сонымен қатар бүкіл кеңес футболының жылнамасында мәңгіге жазылып қалды», – делінген хабарламада.
Ол соңғы жылдары отбасымен бірге Мәскеу қаласында тұрып жатқан болатын.
Гулямхайдаров Душанбенің «Памир» командасының символы еді. Доп тебуді аулада бастаған ол осы команда арқылы өсіп, КСРО-ның олимпиялық құрамасы сапына дейін жетті.
Владимир Гулямхайдаров 1946 жылы 26 ақпанда Душанбе (ол кезде – Сталинабад) қаласында туған. Он жасынан футболды таңдап, «Спартак» стадионындағы секцияда жаттықты. Ал 18 жасында, яғни 1964 жылы Душанбенің «Энергетик» командасы сапында бірінші рет чемпионат ойынына қатысты. 60-жылдардың ақырында республиканың ең күшті ойыншыларының біріне айналды, 1968 жылы КСРО олимпиялық құрамасы сапына шақырылды. Екі жылда оның құрамында 10 ойынға қатысып, 3 гол соқты.
Владимир Гулямхайдаров 1969-1970 жылдары Мәскеудің «Торпедо» командасының футболшысы ретінде КСРО жоғары лигасында өнер көрсетті. Содан кейін Душанбеге қайтып оралды. Ол футболшылық өмірбаянын аяқтағаннан кейін, Мәскеуде жоғары жаттықтырушылар мектебін бітіріп, 1978 жылдан бастап бапкерлікпен айналысты. Көп ұзамай «Памирдің» тізгінін ұстады. Кейінірек «Вахш» командасын, Тәжікстан құрамасын жаттықтырды. Содан кейінгі мансабы ұзақ жылдар бойы Қазақстанда жалғасты. Мұнда «Екібастұз», «Қайрат», «Тараз», «Жетісу», «Мегаспорт», «Локомотив» (Астана) және «Сұңқар» командаларын баптады. Сөйтіп, біздің еліміздің футболына да көп еңбек сіңірді. Ол әріптестері арасында зор беделге ие болды.
Марқұмның жарқын жүзі, жақсы істері оны білетіндердің жады мен жүрегінде ұзақ уақыт сақталады.
Қош бол, футбол мэтрі!
