USD
ҚЫЗЫЛОРДА. 16 қазан. Бүгін Қызылорда облысының Шиелі ауданындағы көп бейінді орталық ауруханада аймақтағы алғашқы үздік тәжірибе орталығы ашылды. Бұл туралы облыс әкімі баспасөз қызметінің дерегіне сүйенген rast.kz хабарлайды.
Аталмыш орталық 25 қазан – Республика күніне орай қатарға қосылып отыр. Ол аймақтағы ең алғашқы үздік тәжірибе орталығы болып табылады.
Денсаулық сақтау нысанының тұсаукесер рәсіміне облыс әкімінің бірінші орынбасары Данияр Жаналинов қатысып, сөз сөйледі. Ол өз сөзінде тұрғындардың медициналық қызметке қолжетімділігін арттыру, денсаулық сақтау инфрақұрылымын одан әрі жетілдіру жайы туралы айта келіп, жиналғандарды орталықтың ашылуымен құттықтады. Жиында сондай-ақ «Primary Health Care» ұлттық қауымдастығының президенті, академик Төлебай Рахыпбеков ізгі тілегін білдірді.
Облыстық денсаулық сақтау басқармасының басшысы Олжас Ысқақов қатысушыларды мұндағы кабинеттермен және әлеуметтік-психологиялық көмек жобасымен таныстырды.
Үздік тәжірибе орталығы жобасы өткен жылдан бері «Premy Health Care» ұлттық ассоциациясымен бірге алғашқы медициналық көмек көрсететін ұйымдарға жаңа технологиялар енгізу шараларын жүзеге асырып келеді.
Алдағы уақытта мұндай орталықтар №3, 6 қалалық емханаларда және Жалағаш аудандық ауруханасында ашылмақ. Олар халықтың медициналық көмекке қолжетімділігін арттырады.
