USD
СЕМЕЙ. 15 маусым. Кеше Семейде ойналған жергілікті «Елімай» мен «Ордабасы» арасындағы матч төрешісінің өрескел дөрекілігі мен бейәдеп сөздерінен кейін кең қарқынмен үлкен жанжал өріс алды. Бұл туралы әлеуметтік желі дерегіне сүйенген rast.kz хабарлайды.
Алдымен жанкүйерлер осы кездесудің соңында астаналық төреші Арман Исмұратовтың гардеробқа барар дәлізде «Елімай» клубының директоры Федор Семинидиге: «Алда әлі жарты маусым бар, соның соңына дейін әкелеріңді танытам» деп жатқаны түсірілген видео тарады. Біз, әрине, «әкелеріңді танытам» деп, барынша жұмсартып айтып отырмыз, шын мәнінде бұл жерде орыстың ең әдепсіз боқтық сөздерінің бірі тұр.
Журналист Оңғар Қабден мұның алдында арбитрдың өзі алаңнан қуып жатқан «Елімай» ойыншысы Жанали Пайрузға орысша «пошел нах.. отсюда» дейтін тұсының да видео бар екенін жазады.
Ал «Елімайдың» бас жаттықтырушысы Андрей Карпович арбитр Арман Исмұратовтың түйінді тұстарда бұра тартып, кездесу нәтижесіне әсер еткенін жазады. Бұдан кейін оның боқтық сөздеріне оралып, өзін «жыртып» жіберетінін айтқанын баяндайды.
Жаттықтырушы мұның «кәсіпқой футболға жатпайтын жабайылық» екенін, енді оны қайтып алаңға жіберуге болмайтынын атап көрсетеді.
Карпович соңында футбол органдары мен төрешілер корпусы тарапынан бұл инцидентке ресми баға берілетініне үміт артатынын айтады.
Оқыс оқиға әлеуметтік желі пайдаланушылар арасында қызу талқыға түсіп жатыр. Мәселеге Парламент депутаттары да араласуда. Мәжіліс депутаты Мұрат Әбенов ол жайлы әлеуметтік желіде пост жариялады.
Көпшілік 1987 жылы Қостанай облысында туған Арман Хамитұлы Исмуратовтың былапыт сөздерінде сондай-ақ күш көрсету, қоқан-лоққы жасау элементтері (Қылмыстық кодекстің 131-бабы) бар екенін де еске салады.
